ايدوس سارىم «جاڭا قازاقستان» توبى تۋرالى: ءۇي ىشىنەن ءۇي تىگۋ ەمەس

نۇر-سۇلتان. قازاقپارات - ق ر پارلامەنتى ءماجىلىسىنىڭ دەپۋتاتى ايدوس سارىم «جاڭا قازاقستان» دەپۋتاتتىق توبىنىڭ قانداي قۇقىقتارى بولاتىندىعىن ايتتى، دەپ حابارلايدى قازاقپارات ءتىلشىسى.

«جالپى پارلامەنتتىڭ رەگلامەنتى مەن كونستيتۋتسيالىق زاڭ بويىنشا دەپۋتاتتىق توپ تىركەلگەننەن كەيىن پارلامەنتتىك تىڭداۋ ۇيىمداستىرۋعا، دەپۋتاتتىق ساۋال جولداۋعا، كەز كەلگەن ۇكىمەتتىك ۇيىمنىڭ باسشىسىن شاقىرۋعا، ەسەپ الۋعا، قۇجاتتارىن سۇراتۋعا قاقىسى بار. ەستەرىڭىزدە بولسا، سوڭعى شاقىرىلىمدا دەپتۋتاتتىق توپتار بولعان جوق. ءبىزدىڭ جۇمىسىمىز ءۇي ىشىنەن ءۇي تىگۋ ەمەس. ەڭ الدىمەن ءماجىلىستىڭ، پارلامەنتتىڭ جۇمىسىن بارىنشا جانداندىرۋىمىز، الەۋەتىن دۇرىس پايدالانۋىمىز، ىشكى رەفورمالاردى جۇزەگە اسىرۋعا كومەكتەسۋىمىز كەرەك. كوپتەگەن باعدارلاماعا سىن ايتىلدى، اقيقات تا ايتىلدى. وعان دا باس-كوز بولۋ قاجەت. وعان دا ساياسي قولداۋ كەرەك ەكەن»، - دەدى ا. سارىم ەلوردادا ۇيىمداستىرعان باسپا ءسوز ءماسليحاتى بارىسىندا.

ايدوس سارىم قورعاس، ۋتيلالىم، الماتىداعى «التىن وردا» بازارى سىندى تۇيتكىلدى ماسەلەلەردى باقىلاۋدا ۇستايتىندىقتارىن اتاپ ءوتتى.

«ءبىزدىڭ ويىمىزشا، وسىنىڭ بارىنە تەك اتقارۋشى بيلىك قانا ەمەس زاڭ شىعارۋشى بيلىك تە تىكەلەي ارالاسىپ، قاداعالاماسا كەيبىر ماسەلەر قالىپ قويادى، ورىندالمايدى نەمەسە ۇزاققا سوزىلىپ كەتەدى. وسى ماسەلەلەرگە ب ا ق-پەن، ساياسي كۇشتەرمەن قاتار ەتەنە ارالاسىپ، ەلدەگى ساياسي- ەكونوميكالىق جانە باسقا دا رەفورمالار مەن جاڭعىرتۋ ۇدەرىستەرىن ىلگەرلەتۋ ءۇشىن ەڭبەك ەتپەكپىز»، - دەدى ايدوس سارىم.

ەسكە سالساق، ءماجىلىستىڭ جالپى وتىرىسىندا دەپۋتات ەدىل جاڭبىرشين «جاڭا قازاقستان» اتتى دەپۋتاتتىق توپ قۇرىلاتىنىن جاريا ەتكەن بولاتىن.

اۆتور: رۋسلان عابباسوۆ