قازاقستاندا قۇمار ويىنداردىڭ شىرماۋىنا تۇسكەندەردىڭ سانى قانشا

نۇر-سۇلتان. قازاقپارات - پارلامەنت سەناتىنىڭ دەپۋتاتى دانا نۇرجىگىتوۆا ويىن بيزنەسى تۋرالى زاڭنامانى جەتىلدىرۋ بويىنشا ءبىرقاتار قادامداردى ۇسىندى، دەپ حابارلايدى قازاقپارات ءتىلشىسى.

سەناتوردىڭ ايتۋىنشا، دەپۋتاتتارعا ازاماتتاردان كوپتەگەن وتىنىشتەر كەلىپ تۇسەدى، ولار بۋكمەكەرلىك كەڭسەلەردى جارنامالاۋعا قاتىستى زاڭنامالىق شارالار قابىلداۋدى تالاپ ەتەدى.

«جارناما تۋرالى» قولدانىستاعى زاڭعا سايكەس، كازينو مەن ينتەرنەت- كازينو قىزمەتتەرىن جارنامالاۋعا تىيىم سالىنادى. ءبىراق بۋكمەكەرلىك كەڭسەلەردىڭ قىزمەتتەرىن جارنامالاۋعا تىكەلەي تىيىم جوق. سوندىقتان مۇنداي كومپانيالاردىڭ جارنامالارى ينتەرنەتتە اگرەسسيۆتى تۇردە العا جىلجۋدا. وسى فاكتىنى ەسكەرە وتىرىپ، بۋكمەكەرلىك كومپانيالاردى جارنامالاۋعا تولىق تىيىم سالۋ بويىنشا قولدانىستاعى زاڭناماعا ءتيىستى وزگەرىستەر ەنگىزۋ قاجەت»، - دەدى دانا نۇرجىگىتوۆا ۇكىمەت باسشىسى ءاليحان سمايىلوۆتىڭ اتىنا جولداعان ساۋالىندا.

دەپۋتاتتىڭ مالىمەتىنشە، قازاقستاندا قۇمار ويىنشىلاردىڭ سانى 350 مىڭنان اسادى، ال ءبىر ويىنشىنىڭ ورتاشا قارىزى 10 ميلليون تەڭگەنى قۇرايدى.

د. نۇرجىگىتوۆا بۇل ماسەلەگە دە نازار اۋدارۋدى سۇرادى. ول سونداي-اق ويىن بيزنەسى سۋبەكتىلەرىنىڭ الەۋمەتتىك جاۋاپكەرشىلىگىن كۇشەيتۋ بويىنشا ءتيىستى جۇمىستار جۇرگىزۋ قاجەتتىگىن دە اتاپ ءوتتى.

اۆتور: رۋسلان عابباسوۆ