تۇركىستان وبلىسىنداعى لەنين، كوممۋنيزم، م. گوركي اتانعان اۋىل اتاۋلارى قازاقشالاندى

تۇركىستان. قازاقپارات - تۇركىستان وبلىسى، كەلەس اۋدانىنداعى 8 ەلدى مەكەننىڭ اتاۋى اۋىستى، دەپ حابارلايدى قازاقپارات ءتىلشىسى.

تۇركىستان وبلىسى اكىمدىگىنىڭ قاۋلىسى مەن تۇركىستان وبلىستىق ءماسليحاتىنىڭ بىرلەسكەن شەشىمىنە سايكەس، كەلەس اۋدانى اقتوبە اۋىلدىق وكرۋگىنىڭ م. گوركي اۋىلى بۇدان بىلاي «كەڭدالا» اتالادى. ال، اقتوبە اۋىلدىق وكرۋگىنىڭ ورتالىعى قىزىلاسكەر اۋىلى «لەسبەك باتىر» اتاۋىنا يە بولدى.

سونداي-اق، اۋدانداعى وردجينيكيدزە اۋىلى «سامبەت ساتتاروۆ»، ديميتروۆو اۋىلى «وراز اتا»، ازەربايجان ەلدى مەكەنى «كولتوعان»، لەنين جولى اۋىلى «اقجول»، پەرۆوە مايا اۋىلى «1-مامىر»، كوممۋنيزم ەلدى مەكەنى «اشىساي» بولىپ وزگەرتىلدى.

«تاۋەلسىزدىكتىڭ ارقاسىندا ءوڭىرىمىز اۋماعىنداعى وتارشىلدىق پەن توتاليتارلىق داۋىرلەردەن قالعان اتاۋلاردان بىرتىندەپ ارىلىپ كەلەمىز. بۇل جۇمىستاردىڭ ارتىندا زيالى قاۋىم مەن ءتۇرلى قوعامدىق بىرلەستىكتەردىڭ جانە جەرگىلىكتى ونوماستيكا كوميسسيالارى تاراپىنان ۇزاق جىلدار بويى تىنىمسىز جۇرگىزىلگەن جۇيەلى جۇمىس ناتيجەسىندە قول جەتكىزدىك» - دەيدى اۋداندىق ونوماستيكا سالاسىنا جاۋاپتى، ىشكى ساياسات، مادەنيەت، تىلدەردى دامىتۋ جانە سپورت ءبولىمى باسشىسىنىڭ ورىنباسارى ەربول نازاروۆ.

اۆتور: قايرات زاينيشەۆ