اڭساعان ءسابي: شىعىس قازاقستاندا ۇشەم دۇنيەگە كەلدى

وسكەمەن. قازاقپارات - شىعىس قازاقستان وبلىسىندا «اڭساعان ءسابي» باعدارلاماسى بويىنشا ەكۇ ارقىلى ۇشەم دۇنيەگە كەلدى، دەپ حابارلايدى قازاقپارات ءتىلشىسى.

«الەۋمەتتىك مەديتسينالىق ساقتاندىرۋ قورى» شقو فيليالى باسپا ءسوز قىزمەتىنىڭ مالىمەتىنە سۇيەنسەك، 32 جاستاعى سەمەي قالاسىنىڭ تۇرعىنى ەكۇ ارقىلى ءۇش بالانىڭ اناسى اتاندى. ول مەرزىمىنەن بۇرىن - جۇكتىلىكتىڭ 34-اپتاسىندا بوسانعان. نارەستەلەردىڭ سالماعى - 2 كەلى 280 گرام، 2 كەلى 300 گرام جانە 2 كەلى 200 گرام.

«وتباسىمىز بۇل باقىتتى 10 -جىلدان استام ۋاقىت كۇتتى. بىلتىر «اڭساعان ءسابي» باعدارلاماسى اياسىندا دەنساۋلىق ساقتاۋ باسقارماسىنىڭ جۇمىس كوميسسياسىنىڭ ماقۇلداۋىمەن ە ك و-دان وتۋگە كۆوتا الدىم. ءبارى ويداعىداي ءوتىپ، بالا كوتەردىم. قۋانىشىمىزدا شەك جوق. وسى باعدارلامانىڭ ارقاسىندا قانشاما وتباسى ءسابيلى بولىپ جاتىر»، - دەيدى ۇشەمنىڭ اناسى ماقپال.

ايتا كەتەيىك، 2022 -جىلدىڭ ءبىرىنشى ايىندا ءوڭىر بويىنشا 23 ەگىز جانە ءبىر ۇشەم جارىق دۇنيە ەسىگىن اشقان. بيىل 488 ايەلگە «اڭساعان ءسابي» باعدارلاماسى شەڭبەرىندە كۆوتا بەرىلمەك.