نۇر-سۇلتان قالاسى اكىمىنىڭ جاڭا ورىنباسارلارى تاعايىندالدى

نۇر-سۇلتان. قازاقپارات - پرەزيدەنت اكىمشىلىگىنىڭ كەلىسىمى بويىنشا مەريتوكراتيا قاعيداتىنا سايكەس نۇر-سۇلتان قالاسى اكىمىنىڭ ورىنباسارلارى بولىپ سارىارقا اۋدانىنىڭ بۇرىنعى اكىمى ەسەت بايكەن جانە ەسىل اۋدانىنىڭ بۇرىنعى اكىمى بەرىك جاكەنوۆ تاعايىندالدى، دەپ حابارلايدى قازاقپارات.

اكىمدىكتىڭ باسپا ءسوز قىزمەتىنەن ءمالىم ەتكەندەي، اسحات ورالوۆ پەن اسقار امرين باسقا جۇمىسقا اۋىسۋىنا بايلانىستى ەلوردا اكىمىنىڭ ورىنباسارلارى قىزمەتىنەن بوساتىلدى.

ەسەت بايكەن ەڭبەك جولىن استانا قالاسىنىڭ ەكونوميكا جانە بيۋدجەتتىك جوسپارلاۋ باسقارماسىندا جەتەكشى مامان قىزمەتىنەن باستادى. ءار جىلدارى استانا اكىمى اپپاراتىنىڭ الەۋمەتتىك-مادەني سالا ءبولىمىنىڭ باس مامانى، استانا اكىمى اپپاراتىنىڭ باس ينسپەكتورى، ۇيىمداستىرۋ-ينسپەكتورلىق ءبولىمىنىڭ باسشىسى بولىپ جۇمىس ىستەدى.

2016-2019-جىلدارى ق ر پرەزيدەنتى اكىمشىلىگى باسشىسى حاتشىلىعىنىڭ ساراپشىسى، ق ر پ ءا مەملەكەتتىك باقىلاۋ جانە اۋماقتىق-ۇيىمداستىرۋ جۇمىسى ءبولىمىنىڭ مەملەكەتتىك ينسپەكتورى، قاراعاندى وبلىسى نۇرا اۋدانىنىڭ اكىمى، نۇر-سۇلتان قالاسى اكىمى اپپاراتىنىڭ باسشىسى لاۋازىمدارىن اتقاردى.

2020-جىلدان باستاپ نۇر-سۇلتان قالاسى سارىارقا اۋدانىنىڭ اكىمى بولىپ جۇمىس ىستەدى.

بەرىك جاكەنوۆ ەڭبەك جولىن 2000-جىلى كوكشەتاۋ قالاسىنىڭ سالىق پوليتسياسى ورگاندارىنان باستادى.

2002-2007-جىلدارى تەمىرتاۋ قالاسى بويىنشا سالىق كوميتەتىنىڭ جەتەكشى جانە باس مامانى قىزمەتتەرىن اتقاردى. سونداي-اق ءار جىلدارى قاراعاندى وبلىسىنىڭ اكىمدىگىندە، قارجى مينيسترلىگىندە قىزمەت اتقارعان. 2015-جىلى پرەزيدەنت اكىمشىلىگى باسشىسىنىڭ حاتشىلىعى مەڭگەرۋشىسىنىڭ ورىنباسارى بولىپ تاعايىندالدى.

2016-جىلدان باستاپ نۇر- سۇلتان قالاسى اكىمى اپپاراتىنىڭ باسشىسى لاۋازىمىن اتقاردى، 2019-جىلدان باستاپ نۇر-سۇلتان قالاسى ەسىل اۋدانىنىڭ اكىمى بولىپ جۇمىس ىستەدى.

ەلوردا اكىمى التاي كولگىنوۆ ورىنباسارلارىنا قالانى جۇيەلى دامىتۋ جونىندە ءبىرقاتار مىندەتتەر جۇكتەدى.