قازاقستاندى جاقسى بىلمەسە دە، ونەرىمىزگە ريزا بولدى - اۆستراليادا ونەر كورسەتكەن بالەرينا
«استانا وپەرا» بالەت تەاترىنىڭ ءسوليسى شۇعىلا قازاقپارات تىلشىسىمەن ساپار اسەرىمەن ءبولىستى.
«بۇل ساپاردان العان اسەرىم شەكسىز. مەن بۇعان دەيىن ۋكراينا، گەرمانيا، يتاليادا ونەر كورسەتتىم. ءبىراق، اۆستراليانىڭ ءجونى بولەك. ويتكەنى، ول جاقتا بالەت ونەرىنە دەگەن سۇرانىس باسقاشا. تاعى ءبىر ۇناعان تۇسى، ءبىز ونەر كورسەتىپ قانا قويماي، شەبەرلىك ساباق الدىق. اۆستراليانىڭ بەتكە ۇستار بالەت ماماندارى ءوز تاجىريبەسىمەن ءبولىستى. مەن جاس ءارتىس بولعاندىقتان، ماعان ۇلكەن ساباق بولدى»، - دەدى شۇعىلا ادەپحان.
سونداي-اق، ءارتىس جەرگىلىكتى حالىقتىڭ قازاقستان تۋرالى سۇراپ، قىزىعۋشىلىق تانىتقانىن ايتتى.
«تانىستىق بارىسىندا قازاقستاننان ەكەنىمدى ايتقانىمدا كوبىسى تاڭعالىپ، ەلىمىز تۋرالى سۇراپ جاتتى. جانە قازاقستاندى جاقىن تانىماسا دا، ونەرىمىزگە ءدان ريزا بولدى. جالپى قازاقستاندىق بالەت الەمدىك بالەتتەن ەرەكشەلەنەدى. ءبىز «سپارتاك» بالەتىنەن ءۇزىندى قويدىق. بۇل وتە ەموتسيونالدى قويىلىم. سوندىقتان دا ەرەكشە اسەر قالدىردىق دەپ ويلايمىن»، - دەيدى ول.
بۇعان دەيىن حابارلاعانىمىزداي، «استانا وپەرا» بالەت تەاترىنىڭ ارتىستەرى اۆستراليادا ونەر كورسەتىپ قايتتى.
«Ballet International Gala» اتتى الەمدىك دەڭگەيدەگى گالا كونسەرتىندە ونەر كورسەتۋگە ورتالىق ازيا ەلدەرىنەن قازاقستان عانا شاقىرتۋ العان. ءبىزدىڭ ارتىستەر 26- قاڭتار مەن 5- اقپان ارالىعىندا اۆستراليانىڭ 2 قالاسىندا بولىپ، ونەرلەرىمەن ءتانتى ەتكەن.
