دەپۋتات جازانى جەڭىلدەتۋگە قاتىستى پرەزيدەنت تاپسىرماسىن ورىنداۋعا شاقىردى
بۇل تۋرالى ءماجىلىستىڭ جالپى وتىرىسىندا دەپۋتات بەرىك دۇيسەنبانوۆ ءمالىم ەتتى، دەپ حابارلايدى قازاقپارات ءتىلشىسى.
«بيىلعى جىلدىڭ 4-5- اقپانىندا ءماجىلىستىڭ ءبىر توپ دەپۋتاتتارىمەن ق ر قىلمىستىق-اتقارۋ كودەكسىنىڭ 32-بابى نەگىزىندە قاڭتار وقيعاسى كەزىندە ۇستالىپ، تەرگەۋ يزولياتورلارىنا قامالعان ازاماتتارمەن، ولاردىڭ تۋىستارىمەن كەزدەستىك. بىزگە قاماۋعا الىنعانداردىڭ تۋىستارىنان ولاردىڭ ىستەرىن ءادىل قاراۋدى جانە جازىقسىزداردى بوساتۋدى سۇراعان 70 تەن استام ارىز كەلىپ ءتۇستى. ودان باسقا الەۋمەتتىك جەلىدە جاريالاعان، جەكە تەلەفونىما دا كۇنىنە ونداعان ارىز-شاعىم تۇسۋدە. ءوسىرىپ، جەتكىزىپ، ەندى قىزىعىن كورەمىن دەپ وتىرعان بالالارىنان ايىرىلىپ، تۇرمەنىڭ تابالدىرىعىن توزدىرىپ، ەشكىمنەن پانا تابا الماي جۇرگەن انالاردىڭ اشى زارىن ەشبىر بريفينگىدەن ەشقانداي مينيستر جەتكىزە المايدى. انالاردىڭ كوز جاسى مەن نالاسىن ءوز كوزىمىزبەن كورىپ، جۇباتۋعا ءسوز تاپپادىق. ايتا كەتەرلىگى، ۇستالعانداردىڭ كەيبىرەۋلەرى جالپى توپتىڭ تولقىنىنا ىلەسىپ، زاڭسىز ارەكەتتەر جاساعانىن مويىنداپ تا وتىر. بۇگىندە ولاردىڭ كوپشىلىگى وزدەرىنىڭ باسقا ماقساتتا پايدالانىلعانىن ءتۇسىنىپ، وكىنۋدە. اۋىر قىلمىستار مەن كىسى ولتىرۋلەر باستالعان كەزدە، الاڭداعى توپتى تاستاپ قايتىپ كەتپەك بولعانى، الايدا، بەلگىسىز بىرەۋلەر قارۋمەن قورقىتىپ، ولاردى تارتىپسىزدىك پەن توناۋعا ماجبۇرلەپ، كوپشىلىك اراسىنان شىعۋعا مۇمكىندىك بەرمەگەنى جايلى مىسالدار دا بار»، - دەدى ب. دۇيسەنبينوۆ ق ر باس پروكۋرورىنىڭ اتىنا جولداعان دەپۋتاتتىق ساۋالىندا.
«ءبىزدىڭ فراكتسيا 26- قاڭتارداعى دەپۋتاتتىق ساۋالىندا بەيبىت تۇرعىنداردى عيماراتتاردى قيراتقان بۇزاقىلار مەن كىسى ولتىرگەن قانىشەرلەردەن اجىراتۋدى ۇسىنعان بولاتىن. مەملەكەتتىك توڭكەرىس جاساپ، جۇزدەگەن ادامنىڭ ءومىرىن قيعاندار زاڭ تالابىنا ساي، قاتاڭ جاۋاپكەرشىلىككە تارتىلۋى ءتيىس. مەملەكەت باسشىسى قاسىم- جومارت كەمەل ۇلى توقايەۆ وسى قيىن ۋاقىتتا ەل تاعدىرى ءۇشىن بار جاۋاپكەرشىلىكتى ءوز موينىنا الدى. پرەزيدەنتتىڭ ساياسي ەرىك-جىگەرى مەن باتىل شەشىمىنىڭ ارقاسىندا عانا قازاقستان مەملەكەتتىلىگىن ساقتاپ، ەلىنىڭ تىنىشتىعىن قورعاپ، ادامداردى مال قۇرلى كورمەي، باستارىن كەسكەن لاڭكەستەردىڭ قۇربانىنا اينالمادى. ارينە، مۇنىڭ بارىنە قۇقىق قورعاۋ ورگاندارى قالاي جول بەردى دەگەن سۇراقتار تۋىندايدى. ءبىراق، سولاردىڭ قاتارىنان سودىرلاردىڭ شابۋىلى كەزىندە العاشقى بولىپ، ءۇش جارىم مىڭ قارۋسىز قىزمەتكەر اياۋسىز سوققىعا جىعىلسا، جيىرماعا جۋىعى قازا تاپتى. ال ولاردىڭ بارلىعى - ءوز ەلىمىزدىڭ ازاماتتارى ەمەس پە؟»، - دەدى دەپۋتات.
ونىڭ پايىمىنشا، بۇگىندە قوعام، ازاماتتارىمىزدى ءبولىپ، ءبىر-بىرىنە قارسى قويۋدى ەمەس، ەلدىگىمىزدى، تاۋەلسىزدىگىمىزدى قولداۋدى قاجەت ەتەدى.
«ءبىز تەرگەۋ يزولياتورىندا راديكالدى اعىم وكىلدەرىن دە كوردىك. الەۋمەتتىك جەلىلەردە تۇرعىن ۇيلەردىڭ تەرەزەلەرىنە اۆتوماتتان وق جاۋدىرعان، مەملەكەتتىك مەكەمەلەرگە باسىپ كىرگەن، ادامدارعا شابۋىل جاساعان سودىرلاردىڭ لاڭكەستىك ارەكەتتەرى بەينەلەنگەن ماتەريالدار جەتكىلىكتى. ارينە، مۇنداي فاكتىلەرمەن تەرگەۋ اينالىسۋى كەرەك. قۇقىق قورعاۋشى ايمان وماروۆا اتاپ وتكەندەي، لاڭكەستەردىڭ كوپشىلىگى ەلدەن شىعىپ ۇلگەرگەن كورىنەدى. بۇل ماسەلەمەن دە ءجىتى اينالىسۋ قاجەت. وسى رەتتە، شالىس قادام باسقان جاستارىمىزعا قاتىستى مەملەكەت تاراپىنان گۋمانيزم تانىتۋ قاجەت دەپ ەسەپتەيمىز. بيىلعى جىلدىڭ 14- قاڭتارىندا بۇل تۋرالى پرەزيدەنت ءوزىنىڭ تۆيتتەرىندە «اۋىرلاتاتىن ءمان- جايلار بولماعان جاعدايدا، «جازانى جەڭىلدەتۋ» شارالارىن قابىلداۋ قاجەت» دەپ جازدى. بۇل ساليقالى دا ادامي كوزقاراس»، - دەدى ب. دۇيسەنبينوۆ.
ونىڭ پىكىرىنشە، ادامداردى ولتىرۋگە جانە عيماراتتاردى تالقانداۋعا قاتىسى جوق ۇستالعاندار بويىنشا، قاجەت بولعان جاعدايدا، ولاردان ەشقايدا كەتپەۋ تۋرالى قولحات الىپ، ۋاقىتشا ۇستاۋ يزولياتورىنان بوساتۋ كەرەك. ۇساق زاڭبۇزۋشىلىققا جول بەرگەندەرگە قاتىستى قىلمىستىق ىستەردى توقتاتىپ، اتا- انالارىنىڭ جاۋاپكەرشىلىگىمەن ۇيلەرىنە جىبەرىلگەنى ءجون. سونداي-اق، تەرگەۋ يزولياتورىندا جاقىندا عانا بالالار ۇيىنەن شىققان، ىزدەۋشىسى جوق بىرنەشە جاس بالا بار.
«ولار ءۇشىن، جازاسىن اۋىرلاتاتىن جاعداي بولماسا، مەن، ءوز اتىمنان بوساتۋدى تالاپ ەتەمىن»، - دەدى دەپۋتات.
ال قاماۋدا قالاتىندارعا:
1) ازاپتاۋ مەن ۇرىپ-سوعۋدان قورعاۋ؛
2) جاراقات العاندارعا نەمەسە باسقا مۇقتاجدارعا مەديتسينالىق كومەك كورسەتۋ؛
3) ادۆوكاتتىق قورعاۋدى قامتاماسىز ەتىپ، تەرگەۋ امالدارى كەزىندە قورعاۋشىلاردىڭ مىندەتتى تۇردە قاتىسۋى تالاپ ەتىلىپ وتىر.
«بۇل جۇمىستى ۇيىمداستىرۋ ءۇشىن ءماجىلىس پەن سەنات دەپۋتاتتارىنىڭ اراسىنان جەدەل تۇردە پارلامەنتتىك كوميسسيا قۇرىپ، ونى تەز ارادا قاماۋدا وتىرعان الماتى، تاراز، شىمكەنت، قىزىلوردا، تالدىقورعان، اتىراۋ، اقتوبە قالالارىنىڭ تەرگەۋ يزولياتورلارىنا جىبەرۋدى ۇسىنامىز»، - دەدى بەرىك دۇيسەنبينوۆ.
