رەسەيدە كوروناۆيرۋسقا قارسى انتيدەنەلەر تۋرالى سەرتيفيكات بەرىلە باستايدى
الەمدە ىندەتتى جۇقتىرعاندار سانى 400 ميلليونعا جۋىقتادى. بۇل تۋرالى قازاقستاندا كوروناۆيرۋستىڭ تارالۋىنا جول بەرمەۋ جونىندەگى ۆەدومستۆوارالىق كوميسسيانىڭ Telegram-كانالىندا جازىلدى، دەپ حابارلايدى قازاقپارات.
COVID-19 ىندەتىنەن ايىققان رەسەيلىكتەر 21- اقپاننان باستاپ كوروناۆيرۋسقا قارسى انتيدەنەلەر تۋرالى سەرتيفيكات الادى، دەپ حابارلادى ر ف دەنساۋلىق ساقتاۋ مينيسترلىگىنىڭ باسپا ءسوز قىزمەتىنەن.
تەستىلەۋ ناتيجەلەرى مەملەكەتتىك قىزمەتتەردىڭ ءبىرىڭعاي پورتالىنا ەنگىزىلەدى. انتيدەنەلەرگە ارنالعان سەرتيفيكاتتىڭ ارەكەت ەتۋ مەرزىمى تەست ناتيجەسىن العان كۇننەن باستاپ التى ايدى قۇرايدى.
سونىمەن قاتار، QR- كودتا ەمدەلۋشى تۋرالى تولىق اقپارات بولادى:
ەكپەلەرى، ۆاكسيناتسياعا قارسى كورسەتىلىمدەرى جانە انتيدەنەلەردىڭ دەڭگەيى. انىقتاما ەلەكتروندى ۇكىمەت سايتىنداعى پاتسيەنتتىڭ جەكە كابينەتىندە «COVID-19-عا قارسى يممۋنداۋ تۋرالى اقپارات» بولىمىندە كورسەتىلەدى.
دجونس حوپكينس ۋنيۆەرسيتەتىنىڭ مالىمەتىنشە، الەمدە COVID-19 جۇقتىرعانداردىڭ جالپى سانى 400 ميلليوننان استى. قايتىس بولعاندار سانى 5761208 گە جەتتى. بۇل ستاتيستيكا ۋنيۆەرسيتەتتىڭ عىلىمي-زەرتتەۋ جوباسى اياسىندا الىنىپ وتىر، ول ناقتى ۋاقىت رەجيمىندە بارلىق ەلدەردەن ەپيدەميا دەرەكتەرىن باقىلايدى.
وسىلايشا، 2021-جىلدىڭ 26- قاڭتارىندا الەمدە COVID-19 راستالعان جاعدايلارى 100 ميلليوننان اسسا، 4- تامىزدا - 200 ميلليون، 2022-جىلدىڭ 6- قاڭتارىندا 300 ميلليونعا جەتتى. بۇگىنگى كۇنى ولاردىڭ سانى 400 ميلليونعا جۋىق.
