ەرلان سايروۆ مينيسترلەر كابينەتىن بۇرىنعى ۇكىمەتتىڭ قاتەلىگىن قايتالاماۋعا شاقىردى
بۇل تۋرالى ءماجىلىستىڭ جالپى وتىرىسىندا دەپۋتات ەرلان سايروۆ ءمالىم ەتتى، دەپ حابارلايدى قازاقپارات ءتىلشىسى.
«كەشە ۇكىمەتتىڭ كەڭەيتىلگەن وتىرىسىندا مەملەكەت باسشىسى قاسىم- جومارت توقايەۆ ەلىمىزدەگى كەدەيشىلىك ماسەلەسىنە باسا نازار اۋداردى. پرەزيدەنت ۇكىمەت مۇشەلەرىنە ازاماتتارىمىزدىڭ كوپشىلىگىنىڭ الەۋمەتتىك جاعدايىن ارتتىرۋ باعىتىندا جەدەل قادام جاساۋعا تاپسىرما بەردى. ەلىمىزدىڭ تاريحىندا حالقىمىزدىڭ الەۋمەتتىك جۇپىنى جاعدايى مەملەكەت باسشىسى دەڭگەيىندە ءبىرىنشى رەت كوتەرىلىپ وتىر. ياعني، پرەزيدەنت قاسىم- جومارت توقايەۆ قوعامدى، ازاماتتاردى، حالىقتى تولعاندىراتىن ماسەلە بويىنشا اشىق، شىنايى اڭگىمەگە شاقىرىپ وتىر دەگەن ءسوز. راسىندا، حالقىمىزدىڭ باسىم كوپشىلىگىنىڭ الەۋمەتتىك جاعدايىنىڭ تومەندىگى ەلىمىزدىڭ تۇراقتى دامۋىنا نەگىزگى تەجەگىش بولىپ سانالادى»، - دەدى ە. سايروۆ ۇكىمەت باسشىسى ءاليحان سمايىلوۆتىڭ اتىنا جولداعان ساۋالىندا.
وسى ورايدا ول مەملەكەت باسشىسى 11 - قاڭتاردا پارلامەنتتە سويلەگەن سوزىندە دە ۇكىمەتكە حالقىمىزدىڭ الەۋمەتتىك جاعدايىن جاقسارتۋ، ازاماتتاردىڭ ءال- اۋقاتىن جەتىلدىرۋ جونىندە ناقتى تاپسىرمالار بەرگەنىن ەسكە سالدى.
«ءبىر اي ءوتتى، ۇكىمەت ءوز دەڭگەيىندە ەڭبەكتەنىپ جاتقان بولار، دەگەنمەن ۇكىمەتتىڭ ءىس- ارەكەتتەرى حالىققا تۇسىنىكتى، اشىق، قادامدارى ازاماتتارمەن تىعىز بايلانىستا بولۋى شارت. الدىڭعى ۇكىمەتتىڭ باستى پروبلەماسى وزدەرىنىڭ ءىس - قادامدارىنىڭ لوگيكاسىن، باعىت- باعدارىن ەلگە، قوعامعا تۇسىندىرە المادى، جابىق ستيلدە جۇمىس ىستەدى. تاريحتان ساباق الاتىن ۋاقىت جەتتى. وسى ورايدا، ءاليحان اسحان ۇلى ءوزىڭىزدىڭ، ۇكىمەت مۇشەلەرىنىڭ ماجىلىسكە، قوعام وكىلدەرىنىڭ قاتىسۋىمەن، پرەزيدەنت بەرگەن كەلەسى تاپسىرمالار: كەدەيشىلىكپەن كۇرەس، جاستار ماسەلەسى، كىشى جانە ورتا بيزنەستى دامىتۋ، سىرتقا زاڭسىز كەتكەن كاپيتالدى قايتارۋ پروبلەماتيكاسى، «سامۇرىق قازىنانى» رەفورمالاۋ، روپ - تى وڭتايلاندىرۋ ماسەلەلەرى بويىنشا ەسەپ بەرگەندەرىڭىز ابزال»، - دەدى دەپۋتات.
«حالىق، قوعام پرەزيدەنت تاپسىرمالارىنىڭ قالاي ورىندالىپ جاتقاندىعى، قانداي جوسپار بار، تاپسىرمانى ورىنداۋدا قانداي قيىندىقتار بار ەكەندىگى جونىندە اشىق، بۇكپەسىز حاباردار بولۋى قاجەت. «جاڭا قازاقستان» فيلوسوفياسى اشىق ديالوگتى، شىنايى ديسكۋسسيانى تالاپ ەتەدى! حالىقتىڭ ماسەلەسى تىنىش كابينەت شەڭبەرىندە ەمەس، قوعاممەن بىرلەسىپ تالقىلانىپ، شەشىلۋى ءتيىس»، - دەدى ەرلان سايروۆ.
اۆتور: رۋسلان عابباسوۆ
