قۇقىق قورعاۋ ورگاندارىنا قىزمەتكە قابىلداۋدا وزگەرىستەر بولادى
«قازاقستان رەسپۋبليكاسىنىڭ كەيبىر زاڭنامالىق اكتىلەرىنە قۇقىق قورعاۋ قىزمەتىن وتكەرۋ ءتارتىبىن جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءبىرىنشى وقىلىمدا قارالدى.
«2011 -جىلى قۇقىق قورعاۋ قىزمەتى تۋرالى ارنايى زاڭ قابىلداندى. بۇل زاڭمەن قىزمەتكەرلەردى الەۋمەتتىك، قۇقىقتىق جانە وزگە دە قامتاماسىز ەتۋ ماسەلەلەرى ءبىر ىزگە كەلتىرىلدى، ورتا ستاندارتتار بەكىتىلدى. دەگەنمەن، ءالى دە رەتتەۋدى قاجەت ەتەتىن ماسەلەلەر بار. اتاپ ايتساق، بارلىق ورگاندار ءۇشىن كادرلىق پروتسەستى، قىزمەتكەرلەرگە قويىلاتىن تالاپتاردى بىردەي ەتۋ قاجەت. ونىڭ ىشىندە قىزمەتكەرلەردى كوتەرمەلەۋ، جازا قولدانۋ، اتاق- شەندەردى بەرۋ، ارنايى ورگانداردان اۋىسۋ، اتتەستاتسيالاۋ جانە جۇمىسىن باعالاۋ ماسەلەلەرى. وسىلاردى رەتتەۋ ماقساتىندا زاڭ جوباسى ازىرلەندى. ونداعى ءبىرىنشى ماسەلە - قىزمەتكە قابىلداۋ ءتارتىبىن وڭتايلاندىرۋ»، - دەدى ءا. شىنداليەۆ.
وسى ورايدا ول 2019 -جىلى دەپۋتاتتاردىڭ قولداۋىمەن زاڭعا تۇزەتۋلەر جاسالىپ، تومەنگى لاۋازىمدارعا كادرلار دايىنداۋدىڭ جاڭا ءتارتىبى ەنگىزىلگەنىن ەسكە سالدى.
«قازىر تومەنگى قىزمەتتەرگە الۋ ءۇشىن جاس ماماندار مىندەتتى تۇردە قۇقىق قورعاۋ اكادەميالارىن ءبىتىرۋى ءتيىس. ال ەندى ورتا جانە جوعارى لاۋازىمدارعا كەلسەك، بۇل قىزمەتتەرگە قۇقىق قورعاۋ ءارى ارنايى ورگانداردا، مەملەكەتتىك جانە اسكەري قىزمەتتە بۇرىن بولعاندار، سۋديالار قابىلدانا الادى. ولار كونكۋرس ارقىلى جانە كونكۋرستان تىس تارتىپتە قىزمەتكە الىنادى. وسى ماسەلە بويىنشا زاڭ جوباسىندا ءبىرقاتار وزگەرىس ۇسىنىلعان. كونكۋرس ارقىلى نەگىزىنەن اعا باسشىسى قۇرامدارعا جەتكىلىكتى تاجىريبەسى بار ادامدار تاعايىندالادى. ولاردى تاعىلىمدامادان وتكىزۋدىڭ قاجەتى از. سوندىقتان زاڭ جوباسى كونكۋرس بويىنشا تاعايىندالعان كانديداتتار ءۇشىن تاعىلىمدامانى الىپ تاستاۋدى ۇسىنادى. ال ارنايى تەكسەرۋدەن كونكۋرستان سوڭ وتەدى. بۇل تۇزەتۋلەر قىزمەتكە قابىلداۋ پروتسەسىن تەزدەتۋگە، قاجەت مامانداردى جۇمىسقا الۋدى جىلدامداتۋعا مۇمكىندىك بەرەدى»، - دەدى باس پروكۋروردىڭ ورىنباسارى.
ونىڭ سوزىنە قاراعاندا، قازىر كونكۋرستان تىس وبلىستىق قۇقىق قورعاۋ ورگاندارىنىڭ باستىقتارى قابىلداسا، ەندى تەك ورتالىق ورگان باسشىسى عانا قابىلدايدى. قابىلداۋ تالاپتارى دا كۇشەيتىلەدى.
«ەندى قىزمەتكە الۋ ءۇشىن 3 جىل ەڭبەك ءوتىلى كەرەك بولادى. ال اسكەردە قاتارداعى سولدات بولعاندار تەك جالپى نەگىزدە قابىلدانادى. كۇشتىك ورگاندارعا جۇمىس ىستەپ جۇرگەن قىزمەتكەرلەر قۇقىق قورعاۋ سالاسىنا اۋىسۋ ارقىلى قابىلدانا الاتىن بولادى. بۇگىندە ولار ارنايى تەكسەرۋدەن، اسكەري دارىگەرلىك كوميسسيادان، پوليگرافتان، تەستىدەن وتكەن سوڭ عانا قابىلدانادى. ەندى بۇل تالاپتار الىپ تاستالماق»، - دەدى اسەت شىنداليەۆ.
اۆتور: رۋسلان عابباسوۆ
