فرانسۋز ايەلدەرى قۇپياسى: ءوزىن-ءوزى باعالاۋدى ارتتىرۋ

نۇر-سۇلتان. قازاقپارات - فرانسۋز ايەلدەرى ومىرگە ريزا بولۋدى بىلەدى. سەنىمدىلىك - ايەل كۇشىنىڭ كىلتى جانە باقىتىنىڭ كەپىلى.

فرانسۋز ايەلدەرى كوپ كوسمەتيكا مەن پلاستيكالىق حيرۋرگياعا جۇگىنبەي- اق، وزدەرىن قالاي سەنىمدى سەزىنەدى؟ ءوزىڭىزدى جاقسى كورۋگە جانە ءوزىن-ءوزى باعالاۋدى ارتتىرۋعا كومەكتەسەتىن بىرنەشە ءتيىمدى ءادىس ۇسىنامىز.

«قۇپيا باق»

اراسىندا ەموتسيالىق تۇرعىدا شارشايتىنىمىز راس. مۇنداي كەزدە بولار- بولماس قيىندىقتاردىڭ ءوزى اشۋلاندىرىپ، بولمىسىمىزدىڭ ءبىر بولىگىن الىپ العانداي بولادى. جاعىمسىزدىقتان باسقا ەشتەڭە اكەلمەيتىن تاماقتان نەمەسە الكوگولدەن جۇبانىش ىزدەگەنشە، شارشاۋ سەبەبىڭىزگە اناليز جۇرگىزىپ، ونىڭ پايدا بولۋىنا قۇرمەتپەن قاراي ءبىلۋ كەرەك.

بىزگە تاۋەلسىزدىك سەزىمى مەن سەنىمدىلىكتى قالىپقا كەلتىرۋ ءۇشىن ەرەكشە پانا كەرەك. بۇل قۇپيا جەر پسيحيكانى «قورەكتەندىرۋى» ءتيىس. ەگەر سىرتقى شىندىقتان كۇش تاپپاساڭىز، سپورتپەن نەمەسە يوگامەن اينالىسۋعا بولادى. ءتىپتى، ديۆانعا جاتىپ، جاعىمدى نارسەلەر جايلى ويلاۋعا جانە جاقسى كۇندەردى ەسكە تۇسىرۋگە دە بولادى. بۇل جەڭىل ءارى جاعىمدى كوڭىل-كۇي سىيلايدى جانە ءوزىڭىزدى قايتادان سەرگەك سەزىنۋگە كومەكتەسەدى.

كىتاپ دۇكەنىنەن ساتىپ العان جاڭا قىزىقتى شىعارما دا پاناڭىزعا اينالا الادى. كىتاپتى تىنىش كافەگە بارىپ وقىڭىز، ۇيگە ادەتتەگىدەن جايراق كەلىڭىز. بۇل كۇندەلىكتى ومىرگە ءوزىڭىزدى ەشكىمگە تاۋەلسىز تۇلعا رەتىندە سەزىنە ورالۋعا مۇمكىندىك بەرەدى.

ادەمى زاتتار

كوپشىلىك كۇندەلىكتى ومىرىندە ەلەۋسىز، «قاراپايىم» زاتتاردى قولدانۋعا ۇيرەنىپ كەتكەن. سول ءۇشىن دە ءوزىن- ءوزى باعالاۋى ءتۇسىپ كەتەدى. كەيدە، ءتىپتى، بىزدە ادەمى زاتتاردىڭ بارىن دا ۇمىتىپ كەتەمىز. ال فرانسۋز ايەلى اجەسى سىيلاعان كۇمىس شاي سەرۆيزىن شكافقا سالىپ قويمايدى. ول شكافتان تەك مەرەكەدە عانا شىقپايدى، كۇن سايىن داستارحانىنىڭ ءسانىن بەرىپ تۇرادى. ادەمى ءارى باعالى زاتتاردى وزىنە قيمايتىن ايەلدەر كوپ، ولار بۇل ادەتىمەن ءوزىن- ءوزى باعالاۋىن ودان سايىن تۇسىرە بەرەدى. سوندىقتان «جاقسىنىڭ» بارلىعىن الدىمەن وزىڭىزگە پايدالانىپ ۇيرەنىڭىز.

ءوز بىرەگەيلىگىن ساقتاۋ

فرانسۋز ايەلدەرى تارتىمدىلىعىنىڭ قۇپياسى - ءوز-ءوزىن جاقسى كورۋى، وزىنە ريزا بولۋىندا. ال ولارعا ادەمى كورىنۋگە جانە وزدەرىن تارتىمدى سەزىنۋگە اقىلى مەن جان دۇنيەسىنىڭ كەڭدىگىن كورسەتەتىن تۇلعالىق بىرەگەيلىگى كومەكتەسەدى. ماحابباتتا جانە وتباسىمەن، دوستارىمەن قارىم- قاتىناستا ەڭ باستىسى - ءوز بولمىسىنىڭ ەرەكشەلىگىن ساقتاي ءبىلۋ. قاسىڭىزداعى كوپتەگەن ادامعا موتيۆاتسيا بەرىپ، باسقالار ءۇشىن باتىرسىنۋىڭىز مۇمكىن. ودان قانداي دا ءبىر قۋانىش الۋىڭىز دا مۇمكىن، ءبىراق ءسىز باسقا ادام ءۇشىن ءومىر ءسۇرىپ بەرە المايسىز (سول سەكىلدى ول دا ءسىز ءۇشىن ءومىر ءسۇرىپ بەرە المايدى). ەگەر ءسىز بىرەۋدىڭ كوشىرمەسىنە اينالساڭىز، ءومىردىڭ قىزىعىن جوعالتۋىڭىز مۇمكىن، سوندىقتان بىرەگەيلىكتى ساقتاپ، ونى دامىتۋ ماڭىزدى.

اينالاداعىلاردى شابىتتاندىرۋ

بۇنى اركەز تۇسىنە بەرمەگەنمەن، ءبىزدىڭ كۇندە بىرەۋدى شابىتتاندىراتىن جانە ءومىردى وزگەرتەتىن مۇمكىندىگىمىز بار. ءار ادام قايتالانباس ءومىردى قالاي ءسۇرۋ كەرەگىن كورسەتەتىن ۇلگىگە اينالا الادى. سوندىقتان ءتىپتى ساناسىز تۇردە بىرەۋگە ۇلگى نەمەسە ۇستاز بولۋىڭىز مۇمكىن. ەگەر ءسىز ءوزىڭىزدىڭ قۋانىشىڭىز نەمەسە سۇيىكتى ادامىڭىز ءۇشىن ادەمى كورىنگىڭىز كەلمەسە، ونى جاس ۇرپاق ءۇشىن جاساۋعا بولادى.

ەگەر باسقا ادامدارعا قاراۋ ءۇشىن جانە ءوزىڭىزدى باسقالارعا كورسەتۋ ءۇشىن سەرۋەنگە شىقساڭىز، جاڭا مۇمكىندىكتەر اشاسىز. ءتاتتى تاماقتىڭ ءدامىن كورۋگە، گۇل ساتىپ الۋعا نەمەسە كورشى دۇكەندەگى كىتاپتاردى قاراۋعا توقتاڭىز. مۇنداي ۇساق- تۇيەكتىڭ ءبارى ادامعا ىشكى سۇيەنىشىن دامىتۋعا، اينالاڭىزداعى ادامدارمەن ورتاق قىزىعۋشىلىق تابۋعا كومەكتەسەدى.

اقپارات دەرەككوزى: massaget.kz