بۇگىن - مۇقاعالي ماقاتايەۆ دۇنيەگە كەلگەن كۇن

نۇر- سۇلتان. قازاقپارات - بۇگىن اقىن مۇقاعالي ماقاتايەۆتىڭ تۋعانىنا 91 جىل تولدى، دەپ حابارلايدى قازاقپارات ءتىلشىسى.
None
None

1931-1976 -جىلدار ارالىعىندا عۇمىر كەشكەن اقىن، اۋدارماشى، دراماتۋرگ، قازاقستان مەملەكەتتىك سىيلىعىنىڭ لاۋرەاتى مۇقاعالي ماقاتايەۆ 9-اقپاندا دۇنيەگە كەلگەنىن ادەبيەتكە جانى جاقىن قازاقتىڭ ءبارى بىلەدى. الماتى وبلىسى رايىمبەك اۋدانىنىڭ تۋماسى جوعارى ءبىلىمدى قازىرگى ءال- فارابي اتىنداعى قازاق ۇلتتىق ۋنيۆەرسيتەتىنەن العان.

1952-1969 -جىلدارى قاراساز باستاۋىش مەكتەبىندە ورىس ءتىلىنىڭ ءمۇعالىمى، قازاق راديوسىنىڭ ديكتورى، شالكودەدە «قىزىل وتاۋ» مەڭگەرۋشىسى، «سوۆەتتىك شەكارا» دەپ اتالعان (قازىرگى «حانتاڭىرى» ) نارىنقول اۋداندىق گازەتتىڭ جاۋاپتى حاتشىسى، «سوتسياليستىك قازاقستان» (قازىرگى «ەگەمەن قازاقستان») گازەتىندە، «مادەنيەت جانە تۇرمىس» (قازىرگى «پاراسات»)، «جۇلدىز» جۋرنالدارىندا ادەبي قىزمەتكەر، جازۋشىلار وداعى پوەزيا ءبولىمىنىڭ كەڭەسشىسى قىزمەتتەرىن اتقارعان.

1973-1974 -جىلدارى ماسكەۋدەگى ادەبيەت جانە ونەر ينستيتۋتىندا وقىعان. اقىننىڭ تىرناقالدى تۋىندىلارى نارىنقول اۋداندىق گازەتىندە 1948 -جىلى جاريالانعان. اقىننان كەيىنگى بۋىنعا مۇرا بولىپ «اق قايىڭ ءانى»، «اققۋلار ۇيىقتاعاندا»، «ارمان»، «شولپان»، «رايىمبەك! رايىمبەك!»، «قاشقىن»، «موتسارت. جان ازاسى» اتتى پوەما تولعاۋلارى مەن 650 دەن استام ليريكالىق ولەڭى قالدى.

ادەبيەت تانۋشىلار مۇقاعالي ماقاتايەۆ قازاق ولەڭىن مازمۇن، ءپىشىن جاعىنان تۇرلەندىرىپ، پوەزياعا ينتونناتسيا، ينۆەرسيا، مازمۇن تۇرعىسىنان جاڭالىق ەنگىزدى دەپ باعالاپ ءجۇر. ول پوەزيا جانرىندا عانا ەمەس، پروزا، دراما، سىن سالاسىندا دا ەڭبەكتەر جازعان. ونىڭ «قوش، ماحاببات» جيناعىنا ءار جىلدار جازىلعان «قۇلپىتاس»، «مارۋسيانىڭ تاۋى»، «وزگەرمەپتى»، «اجە» اڭگىمەلەرى، «قوس قارلىعاش»، «جىل قۇستارى» پوۆەستەرى مەن «قوش ماحاببات» پەساسى، بىرنەشە سىني ەڭبەكتەرى ەنگەن. اۋدارما سالاسىندا شەكسپيردىڭ سونەتتەرىن، دانتەنىڭ «قۇدىرەتتى كومەدياسىن»، ە. ەۆتۋشەنكو، ا. اكوپيان، ف. مورگۋن، ۋ. ۋيتمەن، ر. بەرنس، ف. ءانساريدىڭ ولەڭدەرىن ءتارجىمالاعان.

اقىننىڭ ولەڭدەرىنە نۇرعيسا تىلەنديەۆ، ءشامشى قالداياقوۆ، بەيبىت ورال ۇلى، التىنبەك قورازبايەۆ سياقتى كومپوزيتورلار ءان جازدى. ءالى دە اقىن سوزىنە ءان جازۋشىلار كوپ. ءتىپتى كەيبىر ولەڭىنە بىرنەشە ساز جازىلعان جايتتار دا بار. الماتىدا اقىن اتىندا مەكتەپ، كوشە جانە سول كوشەنىڭ بويىندا ەسكەرتكىشى بار. تۋعان اۋىلى قاراسازدا مۇراجايى اشىلدى. قازاقستان جازۋشىلار وداعى 1985 -جىلى ۇزدىك ادەبي شىعارما اۆتورلارىنا بەرىلەتىن مۇقاعالي ماقاتايەۆ اتىنداعى سىيلىق تاعايىنداعان.

سوڭعى جاڭالىقتار