استانا اكىمدىگى قۇرىلىسى ۇزاققا سوزىلعان تۇرعىن ءۇيدىڭ نەگە سۇرىلگەنىن ءتۇسىندىردى

نۇر-سۇلتان. قازاقپارات - نۇر-سۇلتان قالاسى اكىمدىگىنىڭ باسپا ءسوز قىزمەتى «ساقالدى» قۇرىلىستىڭ سۇرىلگەنى تۋرالى ۆيدەعوعا قاتىستى تۇسىنىكتەمە بەردى، دەپ حابارلايدى قازاقپارات ءتىلشىسى.

«بۇل نىسان ۇزاققا سوزىلعان قۇرىلىس دەپ تانىلعاندىقتان ونى ءسۇرىپ تاستاۋ بويىنشا جۇمىستار جۇرگىزىلگەن بولاتىن. عيمارات قۇرىلىس ەرەجەلەرىن بۇزا وتىرىپ سالىنعانىن ەسكە سالامىز. ونىڭ ۇستىنە ۇزاق ۋاقىت بويى شالا سالىنعان كۇيى تۇرعاندىقتان، نىساننىڭ قاڭقاسى دا بۇلىنگەن. عيمارات ورنالاسقان جەر تەلىمى ينۆەستوردىڭ قاراۋىندا ەكەنىن ايتا كەتۋ كەرەك»، - دەپ تۇسىنىكتەمە بەردى قالا اكىمدىگىنىڭ باسپا ءسوز قىزمەتى.

بۇعان دەيىن الەۋمەتتىك جەلىدە اتالمىش نىساننىڭ قۇلاتىلعان ساتىنەن ۆيدەو تاراعان بولاتىن.