كوكشەتاۋلىق ايەل ۇشەمدى دۇنيەگە اكەلدى
«بىزدە جىل باسى ۇشەمنىڭ دۇنيەگە كەلۋى سياقتى قۋانىشتى جاڭالىقپەن ەستە قالدى. قازىر انالار مەن بالالاردىڭ جاعدايى تۇراقتى. بالالار جاقسى سالماق جيناۋدا» ، - دەدى اقمولا وبلىستىق كوپبەيىندى اۋرۋحاناسى پەريناتالدىق قىزمەتىنىڭ دارىگەرلەرى.
دارىگەرلەر اتاپ وتكەندەي، نارەستەلەر تابيعي جولمەن، ياعني ەكۇ نەمەسە باسقا دا قوسالقى رەپرودۋكتيۆتى تەحنولوگيالاردى قولدانۋسىز دۇنيەگە كەلدى. بۇل راۋشان ەسىمدى ايەلدىڭ ەكىنشى رەت بوسانۋى، ونىڭ بۇعان دەيىن ءبىر بالاسى بار. سابيلەردىڭ ەسىمدەرىن اتا-انالارى كارىم، ءالىم، ءاليحان دەپ قويدى.
دارىگەرلەردىڭ سوزىنشە، ايەلدىڭ جۇكتىلىگى قالىپتى بولدى، بالالار مەرزىمىنەن بۇرىن، جۇكتىلىكتىڭ 34 اپتاسىندا دۇنيەگە كەلدى. ەكى ءسابيدىڭ سالماعى 2 كەلى 244 گرام، ءبىر ءسابي اعالارى اراسىندا ەڭ كىشكەنتاي بولىپ شىقتى، ول 2 كەلى 023 گرام سالماقتا دۇنيەگە كەلدى. بۇل ۇشەم ءۇشىن وتە جاقسى كورسەتكىش. قازىرگى ۋاقىتتا وبلىستىق پەريناتالدىق ورتالىقتىڭ دارىگەرلەرى نارەستەلەردى كۇتۋ بويىنشا بارلىق ءتيىستى شارالاردى جۇرگىزۋدە.
«قازىر سابيلەر پالاتادا، اناسىنىڭ قاسىندا. دارىگەرلەر سابيلەرگە قاراپ، تاماقتاندىرۋدا. بالالاردى تەزىرەك كۇشەيتۋ ءۇشىن اناسى ۇلكەن ءرول اتقارادى. ول مامانداردىڭ بارلىق ۇسىنىستارىن ورىنداۋدا. وسىنىڭ ارقاسىندا ۇلدار تەز سالماق قوسادى. ۇشەمدى دۇنيەگە اكەلۋ ارينە قيىن. مۇندايدا جۇكتى ايەلدەردە قان كەتۋ قاۋپى تۋىندايدى. سول سەبەپتى، بوسانعانعا دەيىنگى ءبولىمنىڭ، پەرزەنتحانانىڭ، نەوناتولوگتاردىڭ، انەستەزيولوگ- رەانيماتولوگتاردىڭ، اكۋشەرلەردىڭ، ورتا مەديتسينالىق قىزمەتكەرلەردىڭ بارلىق بريگادالارىنىڭ ۇيلەسىمدى جۇمىسى ماڭىزدى»، - دەپ ءتۇسىندىردى دارىگەرلەر.
ۇشەم تۋعان انا مەن ونىڭ سابيلەرىنىڭ قاشان ۇيلەرىنە شىعارىلاتىنى ناقتى بەلگىسىز. ازىرگە دارىگەرلەر ولاردى باقىلاپ وتىر.
«بالالاردىڭ دەنساۋلىعىنىڭ كورسەتكىشتەرى نورماعا جەتكەندە، ولار ۇيگە جىبەرىلەدى»، - دەلىنگەن اقمولا وبلىستىق كوپبەيىندى اۋرۋحاناسى پەريناتالدىق قىزمەتىنىڭ مالىمەتىندە.
