الماتىلىقتار پوليتسەيلەرگە ءوز ەرىكتەرىمەن قانشا قارۋ تاپسىردى
الماتى قالالىق پوليتسيا دەپارتامەنتىنىڭ مالىمەتىنشە، تاپسىرىلعان قارۋدىڭ باسىم بولىگى جاپپاي تارتىپسىزدىكتەر كەزىندە قارۋ-جاراق دۇكەندەرىنەن ۇرلانعان.
«7- اقپاننان باستاپ الماتى قالاسىندا «قارۋ» جەدەل الدىن الۋ ءىس-شاراسى وتكىزىلۋدە. اتىس قارۋىن ساقتاۋ ەرەجەلەرىنە ەرەكشە نازار اۋدارىلاتىن بولادى. مۇنداي شارا قالاداعى قىلمىستىق احۋالدىڭ جاقسارۋىنا وڭ اسەر ەتەدى. ەستەرىڭىزگە سالا كەتەيىك، قارۋ تابىلعان نەمەسە انىقتالعان جاعدايدا ازاماتتار ونى ءوز ەركىمەن قۇقىق قورعاۋ ورگاندارىنا تاپسىرۋى قاجەت، بۇل ولاردى قىلمىستىق جاۋاپكەرشىلىكتەن بوساتادى. ازاماتتار قۇقىقتىق ساۋاتتىلىق تانىتىپ، قارۋدى ءوز ەركىمەن تاپسىرىپ جاتىر. بۇگىنگى كۇنى ءوز ەركىمەن 25 قارۋ اكەلىندى»، - دەدى الماتى قالالىق پ د اكىمشىلىك پوليتسيا باسقارماسى باستىعىنىڭ ورىنباسارى بولاتبەك باياتانوۆ.
جەدەل الدىن الۋ ءىس-شارالارىن جۇرگىزۋ بارىسىندا الماتى قالاسى مەن الماتى، جامبىل وبلىستارىنىڭ اۋماقتارىندا پوليتسيا قىزمەتكەرلەرى ۇرلانعان قارۋلاردىڭ 135 قارۋ تاۋىپ، تاركىلەدى.
سونىمەن قاتار، قارۋ-جاراق دۇكەندەرىنە قاتىسى جوق 144 قارۋ كۇدىكتىلەردى ۇستاۋ جانە ءتىنتۋ كەزىندە تاركىلەندى. ۇرلانعان قارۋدى ىزدەۋ جالعاسۋدا.
