جاستار الاياقتار مەن جەمقورلاردىڭ شالقىپ ءومىر ءسۇرىپ جاتقانىن كورىپ وتىر – توقايەۆ
ق ر پرەزيدەنتى قاسىم- جومارت توقايەۆ ۇكىمەتتىڭ كەڭەيتىلگەن وتىرىسىندا وسىنداي وي ايتتى، دەپ حابارلايدى قازاقپارات ءتىلشىسى.
«ادال ەڭبەك ەتۋ - بارىمىزگە ورتاق مىندەت. وكىنىشكە قاراي، كەيدە جۇرت، اسىرەسە جاستار، ماڭداي تەرىن توگىپ جۇمىس ىستەگىسى كەلمەيدى. «اۋىردىڭ ۇستىمەن، جەڭىلدىڭ استىمەن» جۇرگەندى ءجون كورەدى. ويتكەنى ولار «بىزدە ادال ەڭبەك باعالانبايدى» دەپ ويلايدى. جاستار باستىقتار مەن اۋقاتتىلارعا جاقىن جۇرەتىن الاياقتار مەن جەمقورلاردىڭ شالقىپ ءومىر ءسۇرىپ جاتقانىن كورىپ وتىر. ءتىپتى سولارعا قاراپ بوي تۇزەيتىن بولدى. قوعامدا تابىسقا جەتۋدىڭ توتە جولى وسى دەگەن قاتە تۇسىنىك ورنىعۋدا»، - دەدى پرەزيدەنت.
سونداي- اق، ول بۇل قاتە تۇسىنىكتەر جويىلۋ ءۇشىن ماسىلدىقتان ارىلۋ كەرەكتىگىن جەتكىزدى.
«وعان قوسا تاعى ءبىر جاعىمسىز ءۇردىس بار. كەيبىرەۋلەر ادال ەڭبەكپەن جەتىستىككە جەتەتىن مۇمكىندىك جوق ەكەنىن بىلگەن سوڭ ەش ارەكەتسىز قول قۋسىرىپ وتىرادى. جۇمىس ىستەۋدىڭ ورنىنا مەملەكەتكە دە، جاقىندارىنا دا ماسىل بولۋدا. وزىنە جاردەماقى مەن جەڭىلدىك تالاپ ەتىپ، الاقان جايۋدان ارلانبايدى. ءتىپتى جەرگىلىكتى بيلىككە قوقان- لوققى كورسەتۋدەن دە تايىنبايدى. ۇلتتى جەگىدەي جەيتىن وسى كەسەلدەر ەلىمىزدى كەرى تارتۋدا. مينيستردەن مالشىعا، قارجىگەردەن قارا جۇمىسشىعا دەيىن ءارقايسىمىز بۇل تۋرالى تەرەڭ ويلانۋىمىز كەرەك. ءتيىستى قورىتىندى جاساپ، دۇرىس ارەكەت ەتۋىمىز قاجەت. سوندا عانا ءبىز وركەنيەتتى قوعام قۇرا الامىز»، - دەدى قاسىم- جومارت توقايەۆ.
اۆتور: ەسىمجان ناقتىباي
