قازاقستاندا تاۋارلىق گاز تاپشىلىعى تۋىنداۋى مۇمكىن – پرەزيدەنت

نۇر- سۇلتان. قازاقپارات - ەلىمىزدە تاۋارلىق گاز تاپشىلىعى تاۋەكەلى بار. بۇل تۋرالى ۇكىمەتتىڭ كەڭەيتىلگەن وتىرىسىندا ق ر پرەزيدەنتى قاسىم- جومارت توقايەۆ ايتتى، دەپ حابارلايدى قازاقپارات ءتىلشىسى.

«وتكەن جىلى ءبىز ايتارلىقتاي ەنەرگيا داعدارىسىنا تاپ بولدىق. ديزەل وتىنى، اۋە كەروسينى، سۇيىتىلعان مۇناي گازى، ەلەكتر ەنەرگياسى تاپشىلىعى بايقالدى. بۇل ساپاسىز جوسپارلاۋدىڭ، باقىلاۋدىڭ جوقتىعىنىڭ جانە جەكەلەگەن تۇلعالاردىڭ ارام نيەتتى ءىس- ارەكەتىنىڭ سالدارىنان بولدى. بۇگىندە تاۋارلىق گاز تاپشىلىعىنىڭ تاۋەكەلى بار. وتكەن جىلى Kazakhgas ويلانباستان جاڭا ونەركاسىپتىك نىسانداردى گازعا قوسۋعا موراتوري ەنگىزدى. سونىڭ سالدارىنان ءبىرقاتار وڭىردە جاڭا، ونىڭ ىشىندە جوعارى تەحنولوگيالى جانە ەكسپورتقا باعدارلانعان جوبالاردى جۇزەگە اسىرۋعا قاجەتتى گاز جوق»، - دەدى مەملەكەت باسشىسى.

ق ر پرەزيدەنتىنىڭ اتاپ وتۋىنشە، ەلىمىزدە تاۋارلىق جانە سۇيىتىلعان گازدى قوسىمشا وندىرۋگە قاجەتتى بارلىق جاعداي بار.

«ءبىراق، گازدىڭ تەڭگەرىمدى ءارى كوممەرتسيالىق تۇرعىدا تارتىمدى نارىعىن قۇرۋ ماسەلەسى شەشىلەر ەمەس. سوندىقتان ەنەرگەتيكا مينيسترلىگىنەن ناقتى ۇسىنىستار كۇتەمىن»، - دەدى قاسىم- جومارت توقايەۆ.

مەملەكەت باسشىسى قاسىم- جومارت توقايەۆ ماينينگكە سالىناتىن سالىقتى ارتتىرۋدى تاپسىردى.

«بارلىق ماينينگ فەرمالاردى انىقتاۋ، سالىق جانە كەدەن ماسەلەلەرىن تەكسەرۋ قاجەت. الىنعان تەحنيكالىق شارتتاردى، سونداي- اق ولاردىڭ قىزمەتىنىڭ باسقا دا قىرلارىن مۇقيات زەردەلەۋ كەرەك. 15- ناۋرىزعا دەيىن ەسەپ بەرۋلەرىڭىزدى سۇرايمىن»، - دەدى پرەزيدەنت.

ونىڭ ايتۋىنا قاراعاندا، مەملەكەت جۇمىسىن بۇكپەسىز اشىق جۇرگىزەتىن ماينينگكە قارسى ەمەس.

«بۇل سالادا جۇمىس ىستەگىسى كەلەتىندەردىڭ ليتسەنزياسى بولۋى قاجەت. ەلەكتر ەنەرگياسىن اقىلعا قونىمدى تاريف بويىنشا الىپ، كىرىسىن دەكلاراتسيالاۋى جانە سالىق تولەۋى، «جاسىل» ەنەرگەتيكا جوبالارىن ىسكە قوسۋى ءتيىس. ماينينگ سالىقتارىن ءبىز دە ارتتىرامىز. قازىرگى قۋاتتىڭ ءار كيلوۆاتىنا 1 تەڭگە دەگەن مولشەرلەمە وتە ماردىمسىز. ۇكىمەتكە اتالعان سالىقتى ەسەلەپ، ءارى قىسقا مەرزىمدە ارتتىرۋدى تاپسىرامىن»، - دەدى مەملەكەت باسشىسى ۇكىمەتتىڭ كەڭەيتىلگەن وتىرىسىندا.

سونداي- اق، مەملەكەت باسشىسى سيفرلىق ماينينگتى رەتتەۋ مەن دامىتۋ جونىندەگى شەشىمدەردىڭ تولىققاندى پاكەتىن ازىرلەۋدى تاپسىردى.

«ۇكىمەت سيفرلىق ماينينگتى رەتتەۋ مەن دامىتۋ بويىنشا تولىققاندى شەشىمدەر پاكەتىن ازىرلەۋى كەرەك. ناتيجەنى 1- ساۋىرگە دەيىن كۇتەمىن»، - دەپ تاپسىردى قاسىم- جومارت توقايەۆ.

اۆتور: ەسىمجان ناقتىباي