ا ش م حالىقتىڭ جايىلىمدىق جەرگە سۇرانىسىن قولدان ازايتىپ وتىر - توقايەۆ

نۇر- سۇلتان. قازاقپارات - ق ر پرەزيدەنتى قاسىم- جومارت توقايەۆ ۇكىمەتتىڭ كەڭەيتىلگەن وتىرىسىندا اۋىل شارۋاشىلىعى مينيسترلىگىنىڭ كوزبوياۋشىلىقپەن اينالىسىپ وتىرعانىن سىنعا الدى، دەپ حابارلايدى قازاقپارات ءتىلشىسى.

«بوس جاتقان جەرلەردى تەزىرەك قايتارىپ الىپ، ونى اۋىل تۇرعىندارىنا بەرۋدى تاپسىرعان بولاتىنمىن. قازىر حالىق ءۇشىن ايرىقشا ماڭىزى بار جۇمىس ءجۇرىپ جاتىر. ءبىراق بۇل جەردە دە اۋىل شارۋاشىلىعى مينيسترلىگى مەن اكىمدىكتەر كوزبوياۋشىلىققا جول بەرگەن. مينيسترلىك جايىلىمدىق جەردىڭ تاپشىلىعى 6,8 ميلليون گەكتارعا نەمەسە 32 پايىزعا ازايدى دەپ مالىمەت بەرىپ وتىر»، - دەدى پرەزيدەنت.

ءمينيستردىڭ اقپاراتىنشا، بۇل شارۋا قوجالىقتارمەن مەموراندۋمعا قول قويۋدىڭ جانە ەلدى مەكەندەردىڭ اۋماعىن كەڭەيتۋدىڭ ارقاسىندا مۇمكىن بولعان.

«الايدا باس پروكۋراتۋرانىڭ تەكسەرىسى كورسەتكەندەي، ءبىرقاتار وڭىردە جايىلىمدىق جەردىڭ تاپشىلىعى ءالى دە ازايماعان. اقمولا، اتىراۋ جانە قوستاناي وبلىستارىندا اۋىل تۇرعىندارىنا مالىن فەرمەرلەردىڭ جەرىنە جايۋعا رۇقسات بەرىلەدى دەگەن جالعان مەموراندۋم جاسالعان. شىن مانىندە جايىلىم جەردىڭ تاپشىلىعى قاعاز بەتىندە عانا ازايدى. ودان بولەك ايماقتار حالىقتىڭ جايىلىمعا دەگەن سۇرانىسىن تومەندەتىپ كورسەتە باستاعان. ۇكىمەت بۇعان نەگە كوز جۇما قاراپ وتىر؟ مۇنداي ارەكەتتەر اۋىل حالقىنىڭ نارازىلىعىن ورشىتپەسە، كەمىتپەيدى. ۇكىمەتكە جەرگىلىكتى اتقارۋشى ورگاندارمەن بىرلەسىپ، وسى ماسەلەنى تۇبەگەيلى شەشۋدى تاپسىرامىن»، - دەدى مەملەكەت باسشىسى.

اۆتور: ەسىمجان ناقتىباي