پرەزيدەنت قۇرىلىس سالاسىنداعى مونوپوليانى سىنادى

نۇر- سۇلتان. قازاقپارات - ق ر پرەزيدەنتى قاسىم- جومارت توقايەۆ ۇكىمەتتىڭ كەڭەيتىلگەن وتىرىسىندا كوممەرتسيالىق نارىقتى دا، مەملەكەتتىك تاپسىرىستى دا ۋىسىندا ۇستاپ وتىرعان قۇرىلىس كومپانيالارىن سىنعا الدى، دەپ حابارلايدى قازاقپارات ءتىلشىسى.

«ەلىمىزدە بىرنەشە قۇرىلىس كومپانياسى عانا ۇستەمدىككە يە بولىپ وتىر. كوممەرتسيالىق نارىق تا، مەملەكەتتىك تاپسىرىس سالاسى دا سولاردىڭ قولىندا. شىن مانىندە ولار بۇعان اكىمشىلىك رەسۋرستى پايدالانۋ ارقىلى قول جەتكىزۋدە. ۇكىمەتكە باسەكەلەستىك قورعاۋ جانە دامىتۋ اگەنتتىگىمەن بىرگە قۇرىلىس نارىعىن مونوپولياسىزداندىرۋ جانە باسەكەلى دامۋى بويىنشا شارالار پاكەتىن ازىرلەۋدى تاپسىرامىن»، - دەدى مەملەكەت باسشىسى.

پرەزيدەنت ونداي مونوپوليست كومپانيالاردىڭ اتى بەلگىلى ەكەنىن اتاپ ءوتتى.

«تەندەردى ۇتىپ الىپ، ونى قوسالقى مەردىگەرلەرگە بەرەتىن، ولار تاعى باسقا قوسالقى مەردىگەرلەرگە بەرەتىن كومپانيالاردىڭ اتاۋى بەلگىلى. سوندىقتان وعان توقتالماي- اق قويايىن»، - دەدى پرەزيدەنت.

ءىرى ينۆەستيتسيالىق جوبالاردى جۇزەگە اسىرۋ ءۇشىن حالىقارالىق بايقاۋ وتكىزگەن ءجون. «كۆازيمەملەكەتتىك سەكتوردىڭ ينۆەستيتسيالىق جوبالارىنىڭ قۇنى تىم اسىرىپ كورسەتىلەتىنى جاسىرىن ەمەس. ونى از دەسەڭىز، قۇرىلىس بارىسىندا باعا تاعى وسەدى. بۇگىندە «سامۇرىق- قازىنا» ءال- اۋقات قورى 12 ءىرى جوبانى جۇزەگە اسىرۋدا. بۇل - ەنەرگيامەن قامتاماسىز ەتۋگە، گاز وندىرۋگە، تەمىر جول ينفراقۇرىلىمىن سالۋعا قاتىستى جوبالار. جۇمىستىڭ جالپى قۇنى - 3,4 تريلليون تەڭگە»، - دەدى مەملەكەت باسشىسى.

ق ر پرەزيدەنتى اتالعان نىساندار حالىققا قاجەت ەكەنىن باسا ايتتى.

«الايدا، جوبالاردىڭ قۇنىنا جانە مەردىگەرلەردىڭ كونكۋرسسىز تاڭدالۋىنا قاتىستى كوپتەگەن سۇراق تۋىندايدى. مىسالى، كەندىرلىدەگى سۋ تۇشىتاتىن زاۋىتتىڭ جوباسى شەتەلدەگى ءدال وسىنداي جوبالاردان 3 ەسە قىمبات تۇرادى. ەكىباستۇزداعى گرەس پەن الماتىداعى ەنەرگەتيكالىق توراپتى جاڭعىرتۋعا تىم كوپ قاراجات ءبولىنىپ وتىرعان جوق پا؟ وسىنداي مىسالدار از ەمەس. سوندىقتان مۇنداي جوبالاردى جۇزەگە اسىرۋ ءۇشىن اشىق حالىقارالىق بايقاۋ وتكىزگەن ءجون. بۇل قالىپتى تاجىريبەگە اينالۋعا ءتيىس»، - دەدى قاسىم- جومارت توقايەۆ.

اۆتور: مارلان جيەمباي