دوڭگەلەك قانا سالادى: پرەزيدەنت ەلىمىزدە قۇراستىرىلاتىن كولىك سالاسىن تەكسەرۋدى تاپسىردى
بۇل تۋرالى ۇكىمەتتىڭ كەڭەتىلگەن وتىرىسىندا ق ر پرەزيدەنتى قاسىم- جومارت توقايەۆ ايتتى، دەپ حابارلايدى قازاقپارات ءتىلشىسى.
«ونەركاسىپ ساياساتىندا نەگىزىنەن اۆتوكولىك جاساۋ سالاسىنا باسىمدىق بەرىلگەن. ءبىراق، وتاندىق ءونىم ۇلەسى ءالى دە تومەن. اشىلىپ جاتقان جۇمىس ورىندارى دا از. ونەركاسىپ سالاسىنا جاۋاپتى مينيستر يندۋستريالاندىرۋدىڭ بارلىق ماسەلەسىمەن مۇقيات اينالىسۋى ءتيىس. اسىرەسە دامۋ مۇمكىندىگى جوعارى سالالارعا باسا ءمان بەرۋدى تاپسىرامىن»، - دەدى مەملەكەت باسشىسى.
ق ر پرەزيدەنتى الەۋمەتتىك جەلىدە قازاقستاندىق اۆتوموبيلدەردىڭ باسىم بولىگى ەلىمىزگە دايىن كۇيدە جەتكىزىلەتىندىگى تۋرالى اقپاراتتىڭ ءجيى تالقىلاناتىندىعىنا نازار اۋدارتتى.
«تەك دوڭگەلەگىن سالۋ عانا قالادى دەپ جاتادى. بۇل رەتتە اسىرەلەۋ ۇلەسى باسىم بايقالادى. مۇنداي اسىرەلەۋدىڭ ماقساتى دا تۇسىنىكتى. قالاي دەگەندە دە مۇنداي پايىمنىڭ قانشالىقتى شىندىققا ساي كەلەتىندىگىن انىقتاۋ قاجەت. سودان كەيىن شارا قابىلداۋ كەرەك»، - دەدى قاسىم- جومارت توقايەۆ.
اۆتور: مارلان جيەمباي
