توقايەۆ: اۋىل شارۋاشىلىعى مينيسترلىگى ازىرلەگەن قاۋلى اۋقىمدى جەرى بارلاردىڭ يەلىگىن ساقتاۋ تالپىنىسىنا ۇقسايدى

نۇر- سۇلتان. قازاقپارات - ق ر پرەزيدەنتى قاسىم- جومارت توقايەۆ ۇكىمەتتىڭ كەڭەيتىلگەن وتىرىسىندا ءبىر ادامنىڭ قانشا جەرگە يەلىك ەتە الاتىنىن نورماتيۆپەن بەكىتۋدى تاپسىردى، دەپ حابارلايدى قازاقپارات ءتىلشىسى.

«جەردى ۇتىمدى پايدالانۋ ماسەلەسىندەگى ماڭىزدى مىندەتتەردىڭ ءبىرى - ونىڭ ءبىر قولعا شوعىرلانۋىنا جول بەرمەۋ. مەن بۇل تۋرالى بۇرىن دا ايتقانمىن. بۇل جەردە مەن ءونىمنىڭ ەمەس، جەردىڭ شوعىرلانۋىن ايتىپ وتىرمىن. نەعۇرلىم كوبىرەك جەر الىپ، ءبىراق ينۆەستيتسيا سالمايتىندار بار. ءبىرقاتار وڭىردە ءماسليحات شەشىمىمەن ۇلەس مولشەرى عىلىمي نەگىزدەلگەن تاسىلدەرسىز بەكىتىلگەن. اتىراۋ وبلىسىندا ءبىر ادامعا - 89 مىڭ گەكتار، الماتى وبلىسىندا - 96 مىڭ گەكتار، شىعىس قازاقستان وبلىسىندا - 69 مىڭ گەكتار جەر ءبولىنىپ كەتكەن. ال اۋىل شارۋاشىلىعى مينيسترلىگى ءبىر قولدا 98 مىڭ گەكتارعا دەيىن اۋىل شارۋاشىلىعى جەرىن ۇستاۋعا رۇقسات بەرەتىن قاۋلى جوباسىن ازىرلەدى. بۇل - قازىر قولىندا اۋقىمدى القاپتارى بار ادامداردىڭ يەلىگىن ساقتاپ قالۋ ارەكەتىنە ۇقسايدى. ياعني، وسى ءۇردىستى نورماتيۆتىك بازا رەتىندە بەكىتۋگە تالپىنۋ»، - دەدى قاسىم- جومارت توقايەۆ.

ونىڭ ايتۋىنشا، مەملەكەت ءبىر ادامنىڭ اۋقىمدى جەر ۋچاسكەلەرىنە يەلىك ەتۋىنە قارسى ەمەس. «مۇنىڭ جاقسى جاعى بار. ەكونوميكالىق اينالىمعا جەر كوبىرەك تۇسەدى، ونداي اۋقىمنىڭ تيىمدىلىگى دە بولادى - باسەكەگە قابىلەت ارتادى. وعان قارىمتا قاتاڭ مىندەتتەمەلەر، جەردى ناقتى پايدالانۋ جاۋاپكەرشىلىگى بولۋى كەرەك. سوندىقتان ۇكىمەتكە جەر ۋچاسكەلەرىنىڭ شەكتى مولشەرىن انىقتاۋ ءۇشىن ساراپشىلار مەن عىلىمي ينستيتۋتتاردىڭ قاتىسۋىمەن جۇمىس توبىن قۇرۋدى تاپسىرامىن. ونى وسى جىلدىڭ 1- مامىرىنا دەيىن بەكىتۋ كەرەك»، - دەدى پرەزيدەنت.

اۆتور: ەسىمجان ناقتىباي