تەرگەۋ يزولياتورلارىندا كەزدەيسوق قامالعان ادامدار جوق - باس پروكۋراتۋرا
نۇر-سۇلتان. قازاقپارات - تەرگەۋ يزولياتورلارىندا كەزدەيسوق قامالعان ادامدار جوق. بۇل تۋرالى قر باس پروكۋراتۋراسى ارنايى پروكۋرورلار قىزمەتىنىڭ باستىعى ريزابەك وجاروۆ ايتتى، دەپ حابارلايدى قازاقپارات ءتىلشىسى.
«ارنايى پروكۋرورلار 76 كۇدىكتىنى تەرگەۋ يزولياتورلارىنان بوساتتى. قاماۋعا الۋ ەشقايدا كەتپەۋ تۋرالى قولحاتقا، ءۇيقاماققا جانە جەكە كەپىلدىككە اۋىستىرىلدى. ولاردىڭ اراسىندا ەكى ايەل مەن كامەلەتكە تولماعان 9 جاس ءوسپىرىم بولعان. تەرگەۋ يزولياتورلارىندا كەزدەيسوق قامالعان ادامدار جوق ەكەنىن جاۋاپكەرشىلىكپەن مالىمدەيمىز. قاماۋعا تەك اۋىر جانە اسا اۋىر قىلمىستار جاساعانى تۋرالى ناقتى ايعاقتار بار ادامدار عانا الىندى. ءبىز كەلتىرىپ وتىرعان ساندىق مالىمەتتەر - ولار تەك ارنايى پروكۋرورلاردىڭ تەرگەۋىندەگى ىستەر بويىنشا ەكەنىن اتاپ وتكىم كەلەدى»، - دەدى ريزابەك وجاروۆ ورتالىق كوممۋنيكاتسيالار قىزمەتىندەگى بريفينگ بارىسىندا.
