فريستايل-موگۋلدان قازاقستان قۇراماسىنىڭ باپكەرى جانكۇيەرلەردەن كەشىرىم سۇرادى

نۇر-سۇلتان. قازاقپارات - فريستايل-موگۋلدان قازاقستان قۇراماسىنىڭ باس باپكەرى ەلەنا كرۋگلىحينا ءوز سپورتشىلارىنىڭ بەيجىڭ وليمپياداسىنان كەيىنگى جوسپارلارىن ايتىپ بەردى، دەپ حابارلايدى قازاقپارات.

«ءبىز تورەشىلەر باعاسىنا ەش پىكىر بىلدىرە المايمىز. ويتكەنى ولاردىڭ ءبارى تاجىريبەلى ماماندار. ولار وليمپيادا باستالعانعا دەيىن ءتورت جىل بۇرىن تاڭدالادى. اناستاسيا گورودكو - وليمپيادا ويىندارىنىڭ ەڭ جاس قاتىسۋشىسى. سوندىقتان ءبارى الدا. ول ەندى يتالياداعى جارىستارعا دايىندالادى. سوندا ەڭ جاقسى ناتيجە كورسەتەتىن بولادى. جالپى قۇرامامىز دايىن بولدى. ءبىز بۇل وليمپياداعا دايىندالدىق. ءبىراق تۇپكى ناتيجە وسىنداي... ارينە، ءبىزدىڭ دە كوڭىلىمىز ءتۇستى. سوندىقتان جانكۇيەرلەرىمىزدەن كەشىرىم سۇرايمىز. دەگەنمەن، ءومىر وسىمەن اياقتالمايدى»، - دەدى باس باپكەر ەلەنا كرۋگلىحينا جانكۇيەرلەرگە.

ءوز سوزىندە سپيكەر ەندى قورىتىندى جاساپ، شارالار قابىلداۋ كەرەكتىگىن ايتتى.

«بىزگە جازدا دايىندالۋ قيىن بولدى، بۇل كارانتيندىك شارالارعا تىكەلەي بايلانىستى. كۇزدە سىرعاناۋعا بولاتىن قار ىزدەدىك. بارلىق سپورتشىلار ءىس جۇزىندە جىل بويى قاردا دايىندالادى. قازاقستان قۇراماسى بارىنەن دە از جاتتىعادى، ءبىراق سوعان قاراماستان وتە جاقسى ناتيجە كورسەتۋدە. وعان رۋحىمىزبەن، كۇشىمىزبەن، بىرلىگىمىزبەن جەتەمىز. كوماندا - ناعىز مىقتىلار. بۇگىن بارلىعىنا العىسىمدى ايتتىم. ءبىز ءارى قاراي دامي بەرەمىز، ەش بەرىلمەيمىز»، - دەدى ە. كرۋگلىحينا.

ايتا كەتەيىك، 6- اقپان كۇنى قازاقستاندىق جانكۇيەرلەر بەيجىڭ وليمپياداسىنان مەدال كۇتكەن بولاتىن، وكىنىشكە قاراي ءۇمىت اقتالمادى.