ب ق و-دا پوليتسەي جۇكتى ايەلدى قۇتقاردى

ق ر ءى ءى م كولىكتەگى پوليتسيا دەپارتامەنتىنىڭ باسپا ءسوز قىزمەتىنەن تۇسكەن مالىمەتكە قاراعاندا، وقيعا 6-اقپان كۇنى قازاقستان ستانسياسىنان (اقساي قالاسى) 3-4 شاقىرىم جەردە بولدى. ايزا جولداسپايەۆا كۇيەۋى نۇربولمەن بىرگە ورال- الماتى جولاۋشىلار پويىزىمەن اقتوبەگە بارا جاتقان. الايدا قازاقستان ستانسياسىنان شىققاننان كەيىن 8 ايلىق جۇكتىلىگى بار 38 جاستاعى ايەلدەن قان كەتىپ، جاعدايى كۇرت ناشارلاعان. پويىز سول بويدا توقتاپ، ماشينيست- ديسپەتچەر شۇعىل كومەك كەرەكتىگىن حابارلاعان.

وقيعا ورنىنا قازاقستان ستانسياسىنداعى جەلىلىك پوليتسيا ءبولىمىنىڭ باستىعى مۇقاتاي اياپوۆ ءبىرىنشى بولىپ جەتكەن. پويىز دالادا تۇرعاندىقتان، وعان جەدەل جاردەم كولىگى جەتە المايتىن ەدى. پوليتسيا پودپولكوۆنيگى مۇقاتاي اياپوۆ كۇرتىك قارعا قاراماستان، ايەلدى كوتەرىپ الىپ شىعىپ، اۆتوكولىگىمەن ءبورلى اۋداندىق ورتالىق اۋرۋحاناسىنا جەتكىزگەن. اۋرۋحانادا ايەلگە كەسار تىلىگىمەن وتا جاسالىپ، دۇنيەگە قىز بالا كەلدى. نۇربول جولداسپايەۆ قازىرگى كەزدە ايەلى مەن قىزىنىڭ جاعدايى جاقسى ەكەندىگىن ايتىپ، كولىك پوليتسياسى قىزمەتكەرىنە العىسىن ءبىلدىردى.