الەۋمەتتىك جەلىلەردە يمانعالي تاسماعامبەتوۆتىڭ فەيك اككاۋنتتارى پايدا بولدى

تانىمال مەملەكەتتىك قايراتكەرىنىڭ بۇل اككاۋنتتارعا قاتىسى جوق، دەپ جازادى Stopfake.kz. مىسالى، Instagram-داعى وسىنداي اككاۋنتتاردىڭ ءبىرى tasmagambetov_official پاراقشاسىنا 45 مىڭنان استام ادام جازىلعان، ەكىنشىسى - imaangali_tasmagambetov - جازىلۋشىلار سانى مىڭنان اسادى. Facebook-تە دە ونىڭ اتىنان پاراقشالار اشىلعان.

يمانعالي تاسماعامبەتوۆ اڭگىمە بارىسىندا Stopfake.kz-كە بۇل اككاۋنتتارعا قاتىسى جوعىن ايتتى. ول الەۋمەتتىك جەلىلەرگە تىركەلمەگەنىن جەتكىزدى:

«قۇرمەتتى دوستار! سوڭعى ۋاقىتتا الەۋمەتتىك جەلىدە مەنىڭ اتىمنان ءتۇرلى تاقىرىپتا ارانداتۋشىلىق اقپارات جۇكتەلگەن جالعان اككاۋنتتار مەن پاراقشالار پايدا بولىپ جاتىر. ءسوز جوق، بۇل جەكە مەنىڭ ابىروي-بەدەلىمنەن بولەك، ءاربىر ازاماتتىڭ عالامتورداعى قاۋىپسىزدىگىنە تونەتىن ۇلكەن قاتەردى كورسەتەدى. رەسمي تۇردە مالىمدەيمىن، مەنىڭ الەۋمەتتىك جەلىدە ەشقانداي پاراقشام جوق. بارشاڭىزدان مۇنداي ارانداتۋعا قارسى تۇرىپ، جالعان اقپارات تاراتپاۋلارىڭىزدى سۇرانامىن»، - دەپ جازدى يمانعالي تاسماعامبەتوۆ.