ءماجىلىس دەپۋتاتتارى الماتىداعى تارتىپسىزدىكتەر كەزىندە زارداپ شەككەندەردىڭ وكىلدەرىمەن كەزدەستى
ءماجىلىس وكىلدەرى قۇقىق قورعاۋ ورگانى قىزمەتكەرلەرىنىڭ لاۋازىمدىق وكىلەتتىكتەرىن اسىرا پايدالانۋ فاكتىسى بويىنشا حابارلامالار مەن اقپاراتتى تالداۋ قورىتىندىسىنداعى ءمان-جايلاردى انىقتاۋ ءۇشىن الماتىعا كەلدى. ەكى كۇن قاتارىنان كوميتەت مۇشەلەرى جابىرلەنۋشىلەردىڭ وكىلدەرىمەن كەزدەسۋ وتكىزدى، سونداي-اق، جاپپاي تارتىپسىزدىككە قاتىسۋشىلار جاتقان تەرگەۋ يزولياتورىندا بولدى.
«ءبىز ءبارىن ءوز كوزىمىزبەن كورىپ، ۇستالعانداردىڭ قانداي جاعدايدا وتىرعانىنا، تەرگەۋ قالاي جۇرگىزىلىپ جاتقانىنا كوز جەتكىزگىمىز كەلدى. بىزگە وبەكتيۆتى اقپارات قاجەت. سەبەبى، ازاماتتاردىڭ ۇستىنەن ءجۇرىپ جاتقان تەرگەۋدىڭ زاڭدى ءارى ءادىل بولاتىنىنا، سونىڭ قورىتىندىسى بويىنشا شىعارىلاتىن شەشىمدەردىڭ ءادىل بولاتىنىنا كەپىلدىك بەرۋگە مىندەتتىمىز. بۇل ءبىز اقتىق قورىتىندى شىعارۋ ءۇشىن كەلدىك دەگەن ءسوز ەمەس. كونستيتۋتسيا ءبىزدى تەرگەۋ بارىسىنا ارالاسۋدان شەكتەيدى. ءبىزدىڭ مىندەتىمىز - جاۋاپ الۋ كەزىندە ازاماتتاردىڭ شىنىمەن ازاپتالعانىنا، ۇستالعان كەزدە ادامداردى شىنىمەن ۇرعانىنا كوز جەتكىزۋ. بۇل بويىنشا ەشقانداي قۇپيا جوق. العاشقى كۇندەرى قاتىسۋشىلار الاڭنان ۇستالعان كەزدە كۇش قولدانىلعانىن ەشكىم جوققا شىعارىپ وتىرعان جوق. ءبىراق بۇل جاعدايدا ءى ءى م تۇراقتى نەگىزدە جۇمىس جۇرگىزىپ جاتقانىن ايتقىم كەلەدى. ەل پرەزيدەنتى بىردەن باس پروكۋرورعا قۇقىق قورعاۋ ورگاندارى قىزمەتكەرلەرىنىڭ لاۋازىمدىق وكىلەتتىكتەرىن اسىرا پايدالانۋ فاكتىلەرى بويىنشا قىلمىستىق ىستەردى قوزعاۋدى جانە تەرگەۋدى تاپسىردى»، - دەدى ق ر پارلامەنتى ءماجىلىسىنىڭ زاڭناما جانە سوت- قۇقىقتىق رەفورما كوميتەتىنىڭ مۇشەسى گۇلنار بيجانوۆا.
قازىر الماتىدا پروكۋرورلار قىزمەتتىك وكىلەتتىكتەرىن اسىرا پايدالانۋ فاكتىسى بويىنشا 15 قىلمىستىق ءىس قوزعاپ، ونى سىبايلاس جەمقورلىققا قارسى قىزمەت تەرگەۋدە.
«ەكى كۇن قاتارىنان ءبىز جابىرلەنۋشىلەردىڭ وكىلدەرىمەن كەزدەسۋ وتكىزدىك. ولار تەرگەۋمەن اينالىساتىن جانە قۇقىق قورعاۋ ورگاندارىنا كومەكتەسەتىن قوعامدىق كوميسسيانىڭ ەڭ بەلسەندى مۇشەلەرىن جينادى. ءيا، ءبىز جابىرلەنۋشى تاراپتىڭ ءوز بالالارىن نەمەسە تۋىستارىن اقتاپ، قورعايتىنىن تۇسىنەمىز. تەرگەۋ يزولياتورىنداعى بالالار ءبارىن ايتىپ وتىر، ولار شىنىمەن وكىنەدى. ءبىراق مۇندا كۇدىكتىنىڭ جاساعان ىسىنە وكىنەتىنىن، جاسالعان قىلمىستىق ارەكەتىنىڭ قانشالىقتى اۋىر ەكەنىن ەسكەرە وتىرىپ، سوت تيىسىنشە وبەكتيۆتى شەشىم قابىلدايدى. جۇرت ىشىندە ول جاعىنان كۇمان بولماۋى كەرەك. تەرگەۋ تاۋلىگىنە 24 ساعات جۇرگىزىلىپ جاتىر»، - دەپ ءتۇسىندىردى ءماجىلىس وكىلى.
ونىڭ ايتۋىنشا، كامەرالاردى ارالاۋ كەزىندە ءماجىلىس وكىلدەرىنە ازاپتاۋ تۋرالى شاعىم ايتقان ادام كەزدەسپەگەن.
«تەرگەۋ يزولياتورىندعى كامەرالاردىڭ بارىنە بارىپ، ۇستالعاندارمەن كەزدەستىك. جالپى، قازىر جاپپاي تارتىپسىزدىك بويىنشا 234 ادام قاماۋدا وتىر. عيمارات جىلى، تازا. كۇنىنە ءۇش رەت تاماق بەرەدى. مەديتسينالىق كومەك كورسەتىلىپ جاتىر. ءبىر كۇننەن كەيىن ەكى اۋرۋحانادان بەيىندى ماماندار كەلىپ، كومەككە مۇقتاج ادامداردى تەكسەرەدى. مەديتسينالىق- سانيتارلىق بولىمدە اياعىنا وق تيگەن ءۇش ادام بار. كامەرالاردا شاعىمدار بولعان جوق»، - دەدى گۇلنار بيجانوۆا.
الماتى قالالىق پروكۋراتۋراسىنىڭ رەسمي مالىمەتى بويىنشا، 5-10-قاڭتار ارالىعىندا 1257 ادام قۇقىق قورعاۋ ورگاندارىنا جەتكىزىلگەن. وسى كەزەڭدە قانداي دا ءبىر زاڭسىز ارەكتتەرگە قاتىسى بار ەكەنىنە دالەل بولماعان 92 ادام بوساتىلعان. قازىرگى تاڭدا 234 ادامنىڭ 121 ى قولحاتپەن بوساتىلعان.
«بۇگىنگى تاڭدا ۇستالعانداردىڭ كوبى بوساتىلىپ، ۇيدە وتىر دەپ ايتۋعا بولادى. ءبىراق ولاردىڭ قاتىسى بار دەلىنگەن ىستەر بويىنشا تەرگەۋ جالعاسىپ جاتىر جانە سوڭعى نۇكتەنى سوت قويادى. قىلمىستىق ىستەر ۇرلىق، جاپپاي تارتىپسىزدىكتەرگە قاتىسۋ، قارۋ ۇرلاۋ، اۆتوكولىك ۇرلاۋ، قارۋ ساقتاۋ، تەرروريزم اكتىلەرى، زورلاۋ، كىسى ءولتىرۋ، بيلىك وكىلدەرىنە كۇش كورسەتۋ سياقتى باپتار بويىنشا قوزعالعان. ءبىزدىڭ تەرگەۋ بارىسىنا ارالاسۋعا قۇقىعىمىز جوق. ءبىراق كەلىپ تۇسكەن ءاربىر ءوتىنىشتى باقىلاۋعا الامىز. پروكۋروردىڭ وسى باعىتتى ۇيلەستىرۋشى ورىنباسارىمەن، ادام قۇقىقتارى جونىندەگى ۋاكىلمەن تىكەلەي بايلانىستامىز. كەلەسى اپتادا جۇمىس توبىن جيناپ، ۇلكەن دوڭگەلەك ۇستەل وتكىزۋ جوسپارلانۋدا»، - دەپ تۇيىندەدى ءماجىلىس دەپۋتاتى گۇلنار بيجانوۆا.
اۆتور: ەسىمجان ناقتىباي
