بيىل قانداي ماماندىقتارعا سۇرانىس ساقتالادى

«ەڭبەك رەسۋرستارىن دامىتۋ ورتالىعى» اق بولجامداۋ دەپارتامەنتىنىڭ دەرەكتەرى بويىنشا قازاقستاندا وسى جىلى جالدامالى جۇمىسكەرلەردىڭ سانى 6,8-6,9 ميلليون ادامدى قۇرايدى. جالدامالى جۇمىسكەرلەرگە سۇرانىس 188,6 مىڭ ادام بولادى. ونىڭ جارتىسى جۇمىستان شىعاتىن جالدامالى جۇمىسكەرلەردى الماستىرۋ سۇرانىسىنا ساي كەلەدى. سونىمەن قاتار، كۇزەتشىلەر، بۋحالتەرلەر، ساتۋشىلار مەن جۇرگىزۋشىلەر ەڭبەك نارىعىندا ەڭ تانىمال بولىپ، جاپپاي سۇرانىستا قالا بەرەدى.

«وڭىرلەر بويىنشا نەعۇرلىم ەلەۋلى جيىنتىق سۇرانىس جۇمىستان شىعاتىن جالدامالى جۇمىسكەرلەردى الماستىرۋ بويىنشا سۇرانىستى ەسكەرگەندە الماتى قالاسىندا، سونداي-اق الماتى جانە جامبىل وبلىستارىندا ورىن الادى. ال سالالار بويىنشا ءبىلىم بەرۋ، اۋىل شارۋاشىلىعى جانە ساۋدا باعىتتارىنىڭ قىزمەتكەرلەرى كوبىرەك تالاپ ەتىلەدى»، - دەدى ەردو بولجامداۋ دەپارتامەنتىنىڭ ديرەكتورى دميتري شۋمەكوۆ.

ساراپشىنىڭ ايتۋىنشا، ايەلدەردىڭ زەينەتكەرلىك جاسىن ارتتىرۋدى ەسكەرە وتىرىپ، جالپى ەڭبەككە قابىلەتتى جاستاعى حالىق سانى بيىل 11,4 ميلليون ادامعا(2021 -جىلعى دەڭگەيمەن سالىستىرعاندا 98 مىڭعا وسەدى) جەتەدى.

«بيىل جۇمىس كۇشىنىڭ سانى 9,2-9,3 ميلليون ادامدى قۇرايدى. ياعني جالپى وتكەن جىلدىڭ دەڭگەيىندە ساقتالادى. الايدا، ءبىزدىڭ بولجامىمىزشا، ەلىمىزدىڭ ءۇش ءىرى قالاسىندا ەكونوميكالىق بەلسەندى حالىقتىڭ جيىنتىق سانى وسى قالالارداعى جاستار ۇلەسىنىڭ ارتۋى سالدارىنان جانە كوشى- قون سەبەپتەرى بويىنشا 54 مىڭ ادامعا وسەدى»، - دەدى ول.

سونداي-اق، بولجامدارعا سايكەس، جۇمىسسىزدار سانى 461-465 مىڭ ادام دەڭگەيىندە بولادى. ال جۇمىسسىزدىق دەڭگەيى 5 پايىزدان اسپايدى. ءبىلىم بەرۋ جۇيەسى تاراپىنان ورتا مەكتەپتى شامامەن 261 مىڭ ادام بىتىرەدى نەمەسە تاستاپ كەتۋى مۇمكىن دەپ كۇتىلۋدە.

ونىڭ ىشىندە 109 مىڭ ادام - 9-سىنىپتان كەيىن، ال 152 مىڭ ادام 11 (12)-سىنىپتان كەيىن شىعىپ كەتۋى ىقتيمال. كوللەدجدەرگە وسى ساننان 131 مىڭعا جۋىق ادام، جوعارى وقۋ ورىندارىنا 103 مىڭ ادام بارادى. قالعان بۇرىنعى وقۋشىلار قاتارىنان ازاماتتار قازاقستاننان تىس جەرلەرگە (~10 مىڭ ادام) نەمەسە ەڭبەك نارىعىنا شىعادى (~17 مىڭ ادام). وسى جىلى ت ج ك ب- نى شامامەن 145 مىڭ ادام تابىستى اياقتايدى دەپ كۇتىلۋدە، ونىڭ ىشىندە 90 مىڭى - نەگىزگى ورتا ءبىلىم بازاسىندا جانە 49 مىڭى - جالپى ورتا ءبىلىم بازاسىندا، ونىڭ ىشىندە شامامەن 16,4 مىڭ ادام جوعارى ءبىلىم بەرۋ ۇيىمدارىندا وقۋىن جالعاستىرادى.

بۇدان باسقا، جوعارى وقۋ ورىندارىنان جوعارى ءبىلىمى بار 163,5 مىڭ ادام جانە جوعارى وقۋ ورنىنان كەيىنگى ءبىلىمى بار 20 مىڭعا جۋىق ادام شىعارىلاتىن بولادى. جالپى العاندا، ءبىلىم بەرۋ دەڭگەيلەرى اراسىنداعى كۇردەلى اۋىسۋلاردى ەسكەرە وتىرىپ، ەڭبەك نارىعىنا شامامەن 295 مىڭ جۇمىسكەر شىعادى دەپ كۇتىلۋدە.

بازالىق سەناري كەزىندە جالدامالى جۇمىسشىلارعا قاجەتتىلىك، بۇرىن ايتىلعانداي، 188,6 مىڭ ادامدى قۇرايدى. تيىسىنشە، قالعان 106 مىڭ ادام جەكە نەمەسە وبەكتيۆتى سەبەپتەر بويىنشا ءوزىن-ءوزى جۇمىسپەن قامتۋعا، ونىڭ ىشىندە جەكە كاسىپكەرلەر مارتەبەسىنە كوشۋى مۇمكىن.

اۆتور: مارلان جيەمباي