قوستانايلىق پوليتسەي «جىل اقىنى» سىيلىعىنا ۇسىنىلىپ، دوستويەۆسكي مەدالىمەن ماراپاتتالدى

نۇر-سۇلتان. قازاقپارات - قوستانايلىق ساقشى تالعات نۇرعاليەۆ رەسەيدەگى «جىل اقىنى» ۇلتتىق ادەبي سىيلىعىنىڭ نومينانتى اتانىپ، دوستويەۆسكي مەدالىمەن ماراپاتتالدى، دەپ حابارلايدى قازاقپارات ءتىلشىسى.

بۇل تۋرالى رەسەي جازۋشىلار وداعىنىڭ پرەزيديۋمى ءمالىم ەتكەن. قوستاناي وبلىسى رۋدنىي قالاسى پوليتسيا باسقارماسىنىڭ قىزمەتكەرى، پوليتسيا مايورى تالعات نۇرعاليەۆ «ستيحي. رۋ» سايتىنا 60 تان استام ولەڭىن جاريالاعان. كەيىن وعان شىعارمالارى «جىل اقىنى» ۇلتتىق ادەبي سىيلىعىنا ۇسىنىلعانى تۋرالى حابار كەلەدى.

ول كورشى ەلدەگى ادەبي سىيلىقتىڭ نومينانتى اتانىپ قانا قويماي، كونكۋرستىڭ الماناعىنا شىعارمالارىن باستىرۋ مۇمكىندىگىن الىپ وتىر.

تالعات نۇرعاليەۆ - قوستاناي وبلىسى دەنيسوۆ اۋدانى باتالى اۋىلىنىڭ تۋماسى. پوەزياعا اۋەستىگى بالا كەزىنەن بار. ءوزىنىڭ ايتۋىنشا، ۇيدە اكەسى سابىرتاي سانتاي ۇلى بالالارىنا ولەڭ وقىپ بەرەتىن بولعان. وسە كەلە ادەبيەتكە دەگەن ىقىلاسىن ورىس ءتىلى مۇعالىمى ۆالەنتينا بەسپالوۆا دارىتقان.

«تالعات مەكتەپتە ءار ءتۇرلى شىعارماشىلىق بايقاۋلارعا قاتىستى. ول ىشكى ىستەر ورگاندارىندا جۇمىس ىستەي جۇرسە دە پوەزيانى قاتار الىپ ءجۇردى. قىزمەتىن 2002-جىلدان باستاپ پاترۋلدىك پوليتسيا قىزمەتكەرى بولىپ باستاعان. قازىر رۋدنىي قالاسى پوليتسيا باسقارماسىنىڭ ازاماتتىق جانە قىزمەتتىك قارۋ اينالىمىن باقىلاۋ ينسپەكتورى لاۋازىمىندا جۇمىس ىستەيدى»، - دەپ ءتۇسىندىردى وبلىستىق پوليتسيا دەپارتامەنتىنىڭ وكىلدەرى.

ءبىر جىل ىشىندە اقىن ساقشى ماحاببات، تابيعات، وتباسى جانە جۇمىس تۋرالى بىرنەشە ولەڭدەر جيناعىن جازىپ ۇلگەرگەن.

«مەن ءۇشىن بۇل كۇتپەگەن جاعداي بولدى. ولەڭدەرىم وسىنداي باعا الادى دەپ كۇتپەگەن دە ەدىم. بۇل ماراپات شىعارماشىلىعىمنىڭ جاڭا كەزەڭى بولادى دەپ ۇمىتتەنەمىن. ولەڭ ارقىلى ىشتەگى سەزىمدەرىمدى سىرتقا شىعارامىن. ونىڭ وزىندە جۇمىستان قولىم بوساعاندا عانا ۋاقىت تابام»، - دەيدى ساقشى.

پوليتسيا مايورى پوەزيادان بولەك وردەن، مەدالدەر جيناعاندى ۇناتادى. 12 جاسىنان باستاپ ءتۇرلى توسبەلگى جيناپ كەلەدى. قازىر كوللەكتسياسىندا مىڭنان استام ءار ءتۇرلى توسبەلگى بار.