ماجىلىستە كوكتەمگى ەگىن ەگۋ كەزىندە ساپالى قىزمەت كورسەتۋ ماسەلەسى كوتەرىلدى

وسى ورايدا ق ر پرەمەر- ءمينيسترىنىڭ ءبىرىنشى ورىنباسارى رومان سكليارعا ءوزىنىڭ دەپۋتاتتىق ساۋالىن جولدادى، دەپ حابارلايدى قازاقپارات ءتىلشىسى.

وندا دەپۋتاتتىڭ پىكىرىنشە، بيىلعى جىلدىڭ 11 - قاڭتارداعى مەملەكەت باسشىسىنىڭ تاپسىرماسىنا سايكەس ەگىس ناۋقانى كەزەڭىندە جەمشوپ رەسۋرستارىمەن، تۇقىمدارمەن جانە تىڭايتقىشتارمەن قامتاماسىز ەتۋ ماسلەلەرىن جانە ەگىن ەگۋ ناۋقانىن ۇكىمەت قاتاڭ باقىلاۋدا ۇستاۋى ءتيىس. سونداي- اق، سۋبسيديالاردى ءبولۋ كەزىندە ولاردىڭ قولجەتىمدىلىگى مەن ورتا مەرزىمدى كەزەڭگە تۇراقتىلىعىن قامتاماسىز ەتۋ ءۇشىن اۋىل شارۋاشىلىعىندا سۋبسيديالاۋ تەتىكتەرىن جەتىلدىرۋىمىز قاجەت.

«ۇكىمەت 2021 -جىلدىڭ 7 - قىركۇيەگىندە ينفلياتسياعا قارسى ارەكەت ەتۋ شارالارى كەشەنىن قابىلدادى. بۇل ءىس- شارالار تاۋارلىق ۇسىنىستى كەڭەيتۋگە جانە ىشكى نارىقتى تولىقتىرۋعا باعىتتالعان. جوعارىدا اتالعان ءىس- شارانىڭ ءبىر باعىتى اۋىل شارۋاشىلىعى ونىمدەرى ءوندىرىسىنىڭ كولەمىن ۇلعايتۋ بولسا، ال ماڭىزدىسى - كوكتەمگى ەگىس جانە ەگىن جيناۋ جۇمىستارىن قارجىلاندىرۋ. وزدەرىڭىز بىلەتىندەي، كوكتەمگى دالا جۇمىستارى كەزىندە ساپالى اگروتەحنيكالىق جۇمىستار - بولاشاق ەگىننىڭ كەپىلى. وسى تۇستا ايتا كەتۋ كەرەك، مينەرالدى تىڭايتقىشتار مەن تۇقىمداردىڭ باعاسى وتكەن جىلمەن سالىستىرعاندا 2 جانە ودان دا كوپ ەسە ءوستى. سونداي- اق، قازىردىڭ وزىندە قۋاڭشىلىقتىڭ سالدارى اگروقۇرىلىمداردىڭ جاعدايىن ودان سايىن قيىنداتىپ وتىرعان جايى بار»، - دەدى بەكقالي تورعايەۆ.

جالپى، اگرارلىق- ونەركاسىپتىك كەشەنىنىڭ سەكتورىن قولداۋ سالاسىندا ءبىرقاتار پروبلەمالار بار. كوكتەمگى ەگىس جانە ەگىن جيناۋ جۇمىستارعا ارنالعان اۋىل شارۋاشىلىعى مينيسترلىگىنىڭ نورماتيۆىندەگى شىعىندارىنان فەرمەرلەردىڭ ناقتى شىعىندارى ەداۋىر جوعارى. سونىمەن قاتار، «اگرارلىق نەسيە كورپوراتسياسى» ا ق قارجىلاندىراتىن ۇيىم تاراپىنان دا اتالعان نورماتيۆتەردەگى شىعىندار قوسىمشا تاعى تومەندەتىلەدى. مۇنىڭ ءبارى اگرارلىق- ونەركاسىپتىك كەشەنىنىڭ سۋبەكتىلەرىن تولىق قارجىلاندىرماۋعا، ولاردىڭ تاراپىنان ءتيىستى اگروتەحنولوگيالاردى قولدانۋداعى شەكتەۋلەرگە، تيىسىنشە ونىمدىلىكتىڭ، باسەكەگە قابىلەتتىلىكتىڭ تومەندەۋىنە اكەپ سوعادى. شارۋالار بولسا فيۋچەرستەر مەن تاۋارلىق نەسيە الۋعا، ءونىمدى تومەن باعامەن وتكىزۋگە ءماجبۇر بولىپ وتىر.

«تىڭايتقىشتاردى سۋبسيديالاۋ ليميتتەرى ولاردىڭ ناقتى قۇنىنىڭ 10-15 پايىزىن قۇراسا، نورماتيۆتىك قۇجاتتاردا قۇنىنىڭ 50 پايىزى سۋبسيديالانادى دەپ كورسەتىلگەن. مىسالى، اۋىل شارۋاشىلىعى مينيسترلىگىنىڭ نورماسى بويىنشا اممياك سەليتراسىنىڭ 1 تونناسى 36500 تەڭگەنى قۇراسا، 2022 -جىلعا نارىقتاعى باعاسى 178500 تەڭگەنى قۇراپ وتىر، اتاپ ايتقاندا تەك 20 پايىزى ناقتى سۋبسيديالانادى»، - دەدى دەپۋتات.

ونىڭ پايىمىنشا، تۇقىم شارۋاشىلىعىن قولداۋ شاراسى دا ءماز ەمەس. مىسالى، سۋپەرەليتا، ەليتا نەمەسە رس-1 تۇقىمىن ساتىپ الۋعا بەرىلەتىن سۋبسيديالار نارىقتاعى باعامەن سالىستىرعاندا % 30- عا جەتپەيدى. ناتيجەسىندە، ونىمدىلىگى جوعارى سورتتار مەن سەلەكسيالاردى ساتىپ الۋ جانە كوبەيتۋ ىنتالاندىرىلمايدى.

«دەمەك، بۇل ماسەلەلەر اۋىل شارۋاشىلىعى ونىمدەرىنىڭ وزىندىك قۇنىنا تىكەلەي اسەر ەتىپ، ناتيجەسىندە ولاردىڭ باعاسىنىڭ وسۋىنە ىقپال ەتەدى»، - دەدى بەكقالي تورعايەۆ.

جوعارىدا ايتىلعاندارعا بايلانىستى جانە وسى ماسەلەنىڭ وزەكتىلىگىن ەسكەرە وتىرىپ، كەلەسى شارالاردى قابىلداۋ سۇرالدى:

ءبىرىنشى. باسىم داقىلداردى ايقىنداۋ جانە ولاردى ناقتى قاجەتتىلىكتەر بويىنشا قارجىلاندىرۋ.

ەكىنشى. تىڭايتقىشتاردى سۋبسيديالاۋ نورمالارىن فەرمەرلەردىڭ ناقتى قاجەتتىلىكتەرى بويىنشا رەتتەۋ.

ءۇشىنشى. تۇقىم ءىسىن سۋبسيديالاۋ تاسىلدەرىن قايتا قاراۋ، سۋبسيديالاردىڭ ناقتى نورمالارىن ۇلعايتۋ، نارىقتىق باعالاردىڭ وزگەرۋ بولجامىمەن ولاردى نەعۇرلىم جەدەل وزەكتەندىرۋ.

ءتورتىنشى. اۋىل شارۋاشىلىعى مينيسترلىگى جانە «بايتەرەك» ۇلتتىق باسقارۋشى حولدينگى» ا ق، «اگرارلىق نەسيە كورپوراتسياسى» ا ق كوكتەمگى ەگىس جۇمىستارىنا جۇمسالاتىن شىعىندارىنا قارجىلاندىرۋدى ۇلعايتۋ جانە مينەرالدى تىڭايتقىشتار مەن تۇقىمدار باعاسىنىڭ ءوسۋىن ەسكەرە وتىرىپ، سۋبسيديالىق قارجىلاندىرۋ كولەمىن ۇلعايتۋ قاجەت.

اۆتور: رۋسلان عابباسوۆ