سەنات دەپۋتاتتارى تارتىپسىزدىكتەر كەزىندە كوز جۇمعان بەيبىت تۇرعىنداردىڭ جاقىندارىنا كوڭىل ايتتى
سەنات وتىرىسىن باستاعان ءتوراعا ماۋلەن اشىمبايەۆ قاڭتاردىڭ العاشقى كۇندەرىندەگى تارتىپسىزدىكتەر تاۋەلسىزدىك تاريحىنداعى ەڭ قاسىرەتتى وقيعا رەتىندە ەستە قالاتىنىن اتادى.
«وكىنىشكە قاراي، كۇشتىك قۇرىلىمداردىڭ ءبىراز قىزمەتكەرى قازا بولدى. ءبىز ولاردىڭ ەرلىكتەرىن ەشقاشان ۇمىتپايمىز. تەرروريستەردىڭ قولىنان جازىقسىز جاندار دا قايتىس بولدى. قازا بولعان ازاماتتارىمىزدىڭ وتباسىلارى مەن جاقىندارىنا قايعىلارىنا ورتاقتاسىپ، كوڭىل ايتامىز. جاراقاتتانعان ادامداردىڭ تەزىرەك ساۋىعىپ كەتۋىنە تىلەكتەستىگىمىزدى بىلدىرەمىز»، - دەدى ماۋلەن اشىمبايەۆ. بۇل سوزگە سەنات دەپۋتاتى ناريمان تورەعاليەۆ تە قوسىلدى.
«ساۋالىمىزدى جولداۋدان بۇرىن مەملەكەتىمىزگە، ەلىمىزدىڭ كونستيتۋتسيالىق قۇرىلىمىنا قارسى جاسالعان شابۋىل مەن بۇلىكتىڭ سالدارىنان قايتىس بولعان بەيبىت تۇرعىنداردىڭ، قۇقىق قورعاۋ قىزمەتكەرلەرى مەن اسكەريلەردىڭ وتباسىنا قايعىرىپ كوڭىل ايتامىز. تاۋەلسىز ەلىمىزدىڭ تۇتاستىعىنىڭ كەپىلى رەتىندە پرەزيدەنت قاسىم-جومارت كەمەل ۇلى توقايەۆ سىندارلى شاقتا شۇعىل ءارى باتىل قادامدار جاساپ ماڭىزدى شەشىمدەر قابىلدادى»، - دەدى سەناتور.
اۆتور: ەسىمجان ناقتىباي
