كورشى مەملەكەتتەر ەلىمىزدەگى قايعىلى جاعدايعا بايلانىستى كوڭىل ايتۋ جەدەلحاتىن جولدادى
نۇر-سۇلتان. قازاقپارات - قازاقستانداعى قايعىلى وقيعالار كەزىندە كوپتەگەن ادامنىڭ قازا بولۋىنا بايلانىستى قاسىم-جومارت توقايەۆتىڭ اتىنا شەت مەملەكەتتەردىڭ باسشىلارىنان، حالىقارالىق قۇرىلىمداردىڭ وكىلدەرىنەن كوڭىل ايتۋ جەدەلحاتتارى كەلىپ جاتىر، دەپ حابارلايدى اقوردا.
ق ح ر ءتوراعاسى شي جينپيڭ جەدەلحاتىندا قاسىم-جومارت توقايەۆتىڭ مەملەكەت ءۇشىن شەشۋشى ساتتە جاعدايدى جەدەل ءوز باقىلاۋىنا الىپ، باتىل ءارى ناقتى شارالار قابىلداعانىن جازعان.
- وسىدان ءسىزدىڭ ساياساتكەر جانە ەلىڭىز بەن حالقىڭىزدىڭ الدىندا زور جاۋاپكەرشىلىك ارقالاعان تۇلعا رەتىندەگى ەرلىگىڭىز كورىنەدى. مەن مۇنى جوعارى باعالايمىن! قىتاي تاراپى قازاقستاننىڭ تۇراقتىلىعىنا نۇقسان كەلتىرەتىن، ونىڭ قاۋىپسىزدىگىنە قاۋىپ توندىرەتىن، قازاقستان حالقىنىڭ تىنىشتىعىن بۇزاتىن كەز كەلگەن كۇشتەرگە جانە قازاقستاندا سانالى تۇردە حاوس تۋعىزىپ، «ءتۇرلى-ءتۇستى ريەۆوليۋتسيا» جاسايتىن سىرتقى كۇشتەرگە باتىل قارسى شىعادى. قازاقستان مەن قىتاي اراسىنداعى دوستىققا سىنا قاعۋعا جانە ەكىجاقتى ىنتىماقتاستىققا كەدەرگى كەلتىرۋگە تىرىساتىن كەز كەلگەن ارەكەتكە باتىل قارسى تۇرادى، - دەلىنگەن قىتاي ءتوراعاسىنىڭ جەدەلحاتىندا.
وزبەكستان پرەزيدەنتى شاۆكات ميرزيەيەۆ ءوزىنىڭ حاتىندا قاسىم-جومارت توقايەۆقا جانە قازاقستان حالقىنا كوڭىل ايتىپ، ەلىمىزدەگى بەيبىتشىلىكتى ساقتاۋ جولىندا قازا تاپقان قايسار ۇلانداردىڭ جاقىندارى مەن تۋىستارىنىڭ قايعىسىنا ورتاقتاساتىنىن ايتقان.
- باۋىرلاس قازاقستاندا بەيبىتشىلىك پەن تۇراقتىلىقتى قامتاماسىز ەتۋ جولىنداعى ءسىزدىڭ باتىل كۇش-جىگەرىڭىزدى تولىق قولدايتىنىمىزدى تاعى دا ناقتىلاعىم كەلەدى، - دەلىنگەن وزبەكستان كوشباسشىسىنىڭ جەدەلحاتىندا.
قىرعىزستان پرەزيدەنتى سادىر جاپاروۆ جولداعان جەدەلحاتىندا قازاقستاندا بولعان قايعىلى وقيعالاردى زور كۇيزەلىسپەن قابىلداعانىن اتاپ ءوتىپ، قىرعىزستان حالقىنىڭ جانە جەكە ءوزىنىڭ اتىنان مەملەكەت باسشىسى قاسىم-جومارت توقايەۆقا جانە قازاق حالقىنا كوڭىل ايتقان.
- مىزعىماس دوستىق، تاتۋ كورشىلىك جانە ءوزارا سىيلاستىققا نەگىزدەلگەن حالىقتارىمىزدىڭ كوپ عاسىرلىق ورتاق تاريحي، رۋحاني جانە مادەني بايلانىستارىن ەسكەرە وتىرىپ، قىرعىزستان قازاقستان رەسپۋبليكاسىن قاشاندا نيەتتەس، سەنىمدى كورشى ءارى ستراتەگيالىق ارىپتەس رەتىندە قولدايدى، - دەلىنگەن قىرعىزستان باسشىسىنىڭ جەدەلحاتىندا.
بەلارۋس پرەزيدەنتى الەكساندر لۋكاشەنكو كوپتەگەن ادامنىڭ قۇربان بولۋىنا جانە عيماراتتاردىڭ قيراۋىنا اكەپ سوقتىرعان سودىرلار توبىنىڭ ەلىمىزگە جاساعان شابۋىلى حالىقارالىق تەرروريزمنىڭ الەمگە زور قاۋىپ توندىرەتىنىن تاعى دا كورسەتتى دەپ جازعان.
- ەكسترەميستەردىڭ تۇپكى ماقساتى - كوپۇلتتى قازاقستانداعى جاعدايدى تۇراقسىزداندىرۋ، ەلدە حاوس ورناتىپ، كونستيتۋتسياعا قارسى توڭكەرىس جاساۋ جانە ساياسي باعداردى وزگەرتۋ ءۇشىن باۋىرلار اراسىندا سوعىس وتىن ءورشىتۋ ەكەنى ايقىن، - دەپ جازدى بەلارۋس باسشىسى.
تاجىكستان پرەزيدەنتى ەمومالي راحمون جانە تۇرىكمەنستان پرەزيدەنتى گۋربانگۋلى بەردىمۇحامەدوۆ، سونداي-اق ب ۇ ۇ وركەنيەتتەر اليانسىنىڭ جوعارعى وكىلى ميگەل انحەل موراتينوس جانە باسقا دا تۇلعالار قولداۋ ءبىلدىرىپ، كوڭىل ايتتى.
جەدەلحاتتار ءالى دە كەلىپ تۇسۋدە.
