ءبىز شەپتەن شىققان جوقپىز - قاقتىعىس كەزىندە جارالانعان جاۋىنگەر

ق ر ۇلتتىق ۇلانى «باتىس» وڭىرلىك قولباسشىلىعىنىڭ باسپا ءسوز حاتشىسى، پودپولكوۆنيك ەربولات سۇلتانوۆتىڭ ايتۋىنشا، اتىراۋداعى تارتىپسىزدىكتەر كەزىندە 28 سارباز ءتۇرلى جاراقات الدى. سونىڭ ءبىرى - باتىس قازاقستان وبلىسى جانىبەك اۋدانى تاۋ اۋىلىندا تۋىپ-وسكەن دياس سامات. اتىراۋ قالاسىندا ول قىزمەت ەتەتىن 5546-اسكەري ءبولىم جاۋىنگەرلەرى 5-قاڭتار كۇنى وبلىس اكىمدىگى عيماراتى تۇرعان ورتالىق الاڭدا شەپ قۇرىپ، سونداي-اق اسكەري قالاشىق پەن قارۋ- جاراق قويمالارىن كۇزەتىپ تۇردى.

«باستاپقىدا بەيبىت ميتينگى بولدى. بىزگە بەيبىت حالىققا كۇش قولدانباي، ءتارتىپتى قامتاماسىز ەتۋ جونىندە بۇيرىق بولدى. الايدا كەنەتتەن بەلگىسىز جاستار بىزگە شابۋىل جاساپ، قولعا تۇسكەن تاس، تەمىردى لاقتىردى. گاز باللونشالارىن قولداندى. ءاپ-ساتتە اينالا توبەلەسكە اينالىپ كەتتى. الدىڭعى لەكتە تۇرعان مەنىڭ وڭ جاق سامايىما تاس پا، تروتۋار سىنىعى ما، قاتتى ءبىر نارسە ءتيىپ، قان اقتى. قاتارداعى قىزمەتتەستەرىم العاشقى مەديتسينالىق كومەك كورسەتتى. العان جاراقاتىما قاراماستان، شەپتى تاستاپ كەتپەي، اسكەري مىندەتىمدى ورىنداۋدى جالعاستىرا بەردىم»، دەدى د. سامات.

اتىراۋ قالاسىنىڭ تۇرعىنى گۇلجاينا الپىسبايەۆا ۇلگىلى ءتارتىپ پەن باتىلدىق، ۇيىمشىلدىق تانىتقان ۇلتتىق ۇلان جاۋىنگەرلەرى مەن پوليتسيا قىزمەتكەرلەرىنە العىس ءبىلدىردى.

«وسىناۋ قيىن كۇندەرى ساربازدار قازاقستان حالقى مەن اسكەري انتقا ادالدىعىن كورسەتە ءبىلدى. مۇنداي مىسالدار از ەمەس»، دەدى 5546-اسكەري ءبولىم كومانديرى، پودپولكوۆنيك مانات ناۋكەيەۆ.

قازىرگى كەزدە اتالمىش ءبولىمنىڭ جەكە قۇرامى اتىراۋدا پوليتسيا مەن قارۋلى كۇشتەرمەن بىرگە بلوكپوستاردا قىزمەت ەتۋدە، ماڭىزدى مەملەكەتتىك نىسانداردى، اۋەجاي مەن تەمىرجول ۆوكزالىن كۇزەتۋدە.

ەسكە سالا كەتەيىك، بۇدان بۇرىن ورالدا ۇلتتىق ۇلان سودىرلارمەن ۇرىستا قازا تاپقان بوزداقتاردى ەسكە العانىن جازعان بولاتىنبىز.

اۆتور: ەلجان ەرالى