ءاليحان سمايىلوۆ رەۆاكسيناتسيا جايلى: اكىمدىكتەر ماسەلەنى جەكە باقىلاۋعا الۋى ءتيىس

«ەلوردا، الماتى، شىمكەنت قالالارىندا جانە اتىراۋ وبلىسىندا كوروناۆيرۋس ينفەكتسياسىمەن ناۋقاستانۋدىڭ كۇرت وسكەنىن كورىپ وتىرمىن. ولار «قىزىل» ايماققا ءوتتى. التى ءوڭىر «سارى» ايماقتا تۇر. ءبىزدىڭ نەگىزگى مىندەتىمىز - ەپيدەميولوگيالىق احۋالدى باقىلاۋدا ۇستاۋ. حالىقتىڭ سانيتاريالىق-ەپيدەميولوگيالىق تالاپتاردى ساقتاۋى بويىنشا ءىس- شارالاردى كۇشەيتۋ قاجەت. دەنساۋلىق ساقتاۋ مينيسترلىگى، اكىمدىكتەر پ ت ر- تەستىلەۋ سانىن ۇلعايتسىن. جەدەل مونيتورينگ جۇرگىزىپ، مەديتسينا قىزمەتكەرلەرىمەن اۋرۋحانالاردا رەزەرۆتىك ورىنداردىڭ دايىندىعىن قامتاماسىز ەتسىن. ءدارى- دارمەك پەن مەديتسينالىق بۇيىمداردىڭ جەتكىلىكتى بولۋىن قاداعالاۋ قاجەت»، - دەدى ءاليحان سمايىلوۆ بۇگىن ۇكىمەت وتىرىسىندا.

ۇكىمەت باسشىسى ۇيدە مەديتسينالىق كومەك كورسەتۋ ءۇشىن موبيلدى بريگادالاردىڭ جۇمىسىن جانداندىرىپ، ولاردى تەگىن ءدارى- دارمەكپەن قامتاماسىز ەتۋ كەرەكتىگىن، ءدارىحانالاردا ءدارى- دارمەكتىڭ تاپشىلىعىنا جول بەرمەۋ شارالارىن قابىلداۋ قاجەتتىگىن ەسكەرتتى.

«رەۆاكسيناتسيا جاساۋ قارقىنى دا وتە تومەن. سوندىقتان دەنساۋلىق ساقتاۋ مينيسترلىگى مەن اكىمدىكتەرگە حالىققا رەۆاكسيناتسيا جاساۋ قارقىنىن بارىنشا ارتتىرۋدى تاپسىرامىن. اكىمدىكتەر بۇل ماسەلەنى جەكە باقىلاۋعا الۋى ءتيىس»، - دەدى پرەمەر-مينيستر.

اۆتور: مارلان جيەمباي