اۋىل شارۋاشىلىعىن سۋبسيديالاۋ جۇيەسىن جەتىلدىرۋ بويىنشا تۇپكىلىكتى وزگەرىستەر توپتاماسى ازىرلەنۋدە

بۇل تۋرالى ۇكىمەت وتىرىسىندا ق ر اۋىل شارۋاشىلىعى ءمينيسترى ەربول قاراشوكەيەۆ ءمالىم ەتتى، دەپ حابارلايدى قازاقپارات ءتىلشىسى.

«مەملەكەت باسشىسىنىڭ 2022 -جىلعى 11-قاڭتاردا ق ر پارلامەنتى ماجىلىسىندە سويلەگەن سوزىندە بەرگەن تاپسىرمالارىن ورىنداۋ ءۇشىن اۋىل شارۋاشىلىعى مينيسترلىگى مىناداي ءبىرقاتار جۇيەلى شارالار قابىلدايتىن بولادى. مەملەكەت باسشىسىنىڭ تاپسىرماسىمەن سالانى مەملەكەتتىك قولداۋ جۇيەسىن تۇزەتۋ بويىنشا ۇسىنىستار دايىندالدى. ولار، ەڭ الدىمەن، قولداۋ تەتىكتەرىن وڭايلاتۋعا، باعىتتارىن وڭتايلاندىرۋعا، شارۋاشىلىق جۇرگىزۋدىڭ مولشەرى مەن نىساندارىنا قاراماستان، بارلىق سۋبەكتىلەر ءۇشىن تەڭ قولجەتىمدىلىكتى قامتاماسىز ەتۋگە باعىتتالاتىن بولادى. سونداي- اق سۋبسيديا الۋشىلار ناقتى ينديكاتيۆتىك كورسەتكىشتەرگە قول جەتكىزۋ تۋرالى قارسى مىندەتتەمەلەردى مىندەتتى تۇردە قابىلدايتىن نورما ەنگىزىلەدى»، - دەدى مينيستر.

ونىڭ اتاپ وتۋىنشە، ۇسىنىستاردى قازىرگى ۋاقىتتا قۇرىلعان اگروونەركاسىپتىك كەشەندى مەملەكەتتىك قولداۋدىڭ تيىمدىلىگىن ارتتىرۋ جونىندەگى جۇمىس توبى قاراۋدا. وعان سالالىق قاۋىمداستىقتار مەن وداقتاردىڭ، اگروبيزنەستىڭ، عىلىمنىڭ، مۇددەلى مەملەكەتتىك جانە جەرگىلىكتى اتقارۋشى ورگانداردىڭ وكىلدەرى، سونداي- اق قازاقستان رەسپۋبليكاسى پارلامەنتىنىڭ سەناتى مەن ءماجىلىسىنىڭ دەپۋتاتتارى كىردى. قازىرگى ۋاقىتتا جۇمىس توبىنىڭ ءۇش وتىرىسى ءوتتى.

«جۇمىس توپتارىنىڭ قورىتىندىلارى بويىنشا وڭىرلەردەن، سالالىق وداقتار مەن قاۋىمداستىقتاردان، جۇمىس توبى مۇشەلەرىنەن اگروونەركاسىپتىك كەشەندى سۋبسيديالاۋدىڭ جاڭا جۇيەسىنە كوپتەگەن ۇسىنىستار مەن ەسكەرتۋلەر كەلىپ ءتۇستى. ولار جۇيەلەندىرىلىپ، نەگىزدى ۇسىنىستار مەن ەسكەرتۋلەر سۋبسيديالاۋ جۇيەسىن پىسىقتاۋ كەزىندە ەسكەرىلەتىن بولادى. جۇمىس توپتارىن وتكىزۋ قورىتىندىسى بويىنشا 2022 -جىلعى ناۋرىزدا سۋبسيديالاۋ جۇيەسىن جەتىلدىرۋ بويىنشا تۇپكىلىكتى وزگەرىستەر توپتاماسىن ۇكىمەتتىڭ قاراۋىنا ەنگىزۋ جوسپارلانۋدا»، - دەدى ول.

سونىمەن قاتار ول مينيسترلىك سۋبسيديالاۋدىڭ ءبىرىڭعاي ينتەگراتسيالانعان مەملەكەتتىك اقپاراتتىق جۇيەسىن ازىرلەگەندىگىن اتاپ ءوتتى.

«اقپاراتتىق جۇيەنىڭ كورسەتىلەتىن قىزمەتتەرى سۋبسيديا الۋشىلار ءۇشىن تەگىن بولادى. قازىرگى ۋاقىتتا ونى اقمولا وبلىسىندا پيلوتتىق رەجيمدە تەستىلەۋدەن وتكىزبەكپىز»، - دەدى ەربول قاراشوكەيەۆ.