ەپيدجاعداي ناشارلاۋدا: التاي كولگىنوۆ قالا تۇرعىندارىنا ۇندەۋ جاسادى

نۇر- سۇلتان. قازاقپارات - نۇر- سۇلتان اكىمى التاي كولگىنوۆ سوڭعى كۇندەرى قالادا ەپيدەميولوگيالىق احۋال ناشارلاي تۇسكەنىن ءمالىم ەتتى.

ول سونداي- اق تۇرعىنداردى ۆاكتسيناتسيادان جانە ريەۆاكتسيناتسيادان وتۋگە شاقىردى، دەپ حابارلايدى قازاقپارات.

«قۇرمەتتى قالا تۇرعىندارى! قالادا قاۋىپسىزدىك پەن قۇقىقتىق ءتارتىپتى قامتاماسىز ەتۋ بويىنشا احۋال تۇراقتى. الايدا، سوڭعى كۇندەرى ەپيدەميولوگيالىق جاعداي كۇرت ناشارلاپ كەتتى. ەلوردا «قىزىل» ايماققا ءوتتى. ەگەر بۇعان دەيىن كوروناۆيرۋس جۇقتىرۋدىڭ تاۋلىگىنە ورتا ەسەپپەن 100 گە جۋىق جاعدايى تىركەلسە، قازىر بۇل كورسەتكىش 1200 دەن 1,5 مىڭعا دەيىن وزگەردى! كۇنىنە 100 گە جۋىق ناۋقاس اۋرۋحاناعا جاتقىزۋدى قاجەت ەتەدى. بۇل جاي عانا سان ەمەس، ونىڭ ءارقايسىسىنىڭ ارتىندا ءار ازاماتتىڭ دەنساۋلىعى تۇر. ال بۇل قالانىڭ مەديتسينالىق مەكەمەلەرىنە ۇلكەن جۇكتەمە!»، - دەپ جازدى ا. كولگىنوۆ Instagram-دا.

ونىڭ ايتۋىنشا، ەلوردادا ۆيرۋستىڭ جاڭا «وميكرون» شتامى تىركەلگەلى احۋال كۇرت ناشارلاعان.

«قالامىزدا كوروناۆيرۋستىڭ جاڭا شتامى - «وميكرون» پايدا بولعالى بەرى ناۋقاستار قاتارى كۇرت وسكەنىن بايقاپ وتىرمىز. دارىگەرلەر ايتقانداي، بۇل جاعداي وتكەن مەرەكەلىك كۇندەرمەن تىكەلەي بايلانىستى. وميكرون شتامى جىلدام تارايدى، بارلىق جاستاعى ادامعا جۇعادى. جەدەل مەديتسينالىق جاردەم ستانتسياسىنا تاۋلىگىنە 4,5 مىڭنان اسا ادام جۇگىنەدى، شاقىرۋلار - 2 مىڭنان استام. بۇگىن №10 ەمحاناعا باردىم. نەگىزگى كۇش قالانىڭ ەمحانالارىنا ءتۇسىپ وتىر. امبۋلاتوريالىق قىزمەتتەردىڭ جۇمىسىن كۇشەيتۋدى تاپسىردىم. وسىعان دەيىن كوروناۆيرۋسپەن اۋىراتىن ناۋقاستاردىڭ ۇيىنە قاتىنايتىن ءموبيلدى بريگادالاردىڭ سانى 300 گە دەيىن ارتقان. سول سياقتى قالانىڭ مەديتسينالىق مەكەمەلەرى قوسىمشا جابدىقتارمەن جانە ءدارى- دارمەكتەرمەن جابدىقتالعان. قوسىمشا تاعى 4 اۋرۋحاناعا ينفەكتسيالىق ستاتسيونارلار ورنالاستىرىلدى. بۇل بىزگە توسەك سانىن ەكى ەسە ارتتىرۋعا مۇمكىندىك بەرىپ وتىر. جالپى العاندا 1200 دەن استام توسەك- ورىن بار. ناۋقاستار سانىنىڭ ودان ءارى وسۋىنە جول بەرمەۋ ءۇشىن قالا تۇرعىندارىن سانيتارلىق نورمالاردى قاتاڭ ساقتاۋعا، ادام كوپ جينالاتىن ورىندارعا بارماۋعا، ءبىر- بىرىنە قوناققا بارماۋعا، ءىرى وتىرىستارعا قاتىسپاۋعا شاقىرامىن»، - دەدى نۇر- سۇلتان باسشىسى.

سونداي- اق التاي كولگىنوۆ قالا تۇرعىندارىن ۆاكسيناتسيادان جانە ريەۆاكسيناتسيادان قارقىندى وتۋگە ۇندەدى.