قاراعاندىدا بلوكپوستا تۇرعان ساربازدارعا ىستىق تاماق تاراتىلدى

ءبىر اپتاعا جۋىق ۋاقىت ءۇي كورمەي، قىستىڭ سۋىعىنا قاراماستان ءوز مىندەتىن اتقارىپ جاتقان كۇش قۇرىلىمىنا قازاقستاندىقتار بارىنشا قولداۋ كورسەتىپ جاتىر، دەپ حابارلايدى قازاقپارات ءتىلشىسى.

وبلىس ورتالىعى قاراعاندىنىڭ اينالاسىنا جالپى سانى 8 بلوكپوست قويىلدى. قاراعاندى مەن تەمىرتاۋدىڭ اراسىنداعى بلوكپوستا تۇرعان ساربازدار مەن پوليتسيا قىزمەتكەرلەرىنە انەت بابا مەشىتىنىڭ يمامدارى مەن كاسىپكەرلەر بىرىگىپ ىستىق اس تاراتتى. دالادا -17 گرادۋس اياز. اقىرىن سوققان جەلدىڭ ءوزى بەتتى قاريدى. بلوكپوستا تۇرعان پوليتسەيلەر مەن قارۋلى ساربازدار قاراعاندى قالاسىنا كىرىپ جاتقان ءار كولىكتى توقتاتىپ، قۇجات پەن جۇكسالعىشتى تەكسەرىپ جاتىر. انەت بابا مەشىتىنىڭ يمامدارى كاسىپكەرلەرمەن بىرلەسىپ قاقاعان قىسقا قاراماي بەكەتتى كۇزەتىپ تۇرعاندارعا ىستىق شاي مەن ىستىق تاماق اكەلدى.

«بارشامىزعا بەلگىلى، قازىرگى تاڭدا قۇقىق قورعاۋ ورگاندارىنىڭ قىزمەتكەرلەرى مەن اسكەري قىزمەتشىلەر نەشە كۇننەن بەرى ءۇيىن، تۋعان- تۋىسىن كورمەي قىزمەت اتقارىپ جاتىر. حالقىمىزدىڭ تىنىشتىعى ءۇشىن ارپالىسىپ جاتقان باۋىرلارىمىزعا قازاقستان ءدىني باسقارماسىنىڭ اتىنان مۇفتيدەن باستاپ، وبلىستاعى كوپتەگەن يمامدار وسىنداي قايىرىمدىلىق اكتسياسىن ۇيىمادستىردى»، - دەيدى وبلىستىڭ باس يمامى ءومىرزاق قاجى بەكقوجا.

قايىرىمدى ءىستى ۇيىمداستىرۋشىلار بۇل ءالى باستاماسى عانا دەيدى. ءوڭىرىمىزدىڭ كاسىپكەرلەرى مەن تۇرعىندارى يگى شارادان تىس قالمايتىنىنا سەنىمدى ەكەنىن ايتادى. ءدىن وكىلدەرىمەن قاتار بۇكىل جاناشىر قازاقستاندىقتاردىڭ باستاماسىن قولداۋ ءۇشىن قاراعاندى قالاسىنىڭ قوعامدىق كەڭەسى ق ر ءى ءى م ۇلتتىق ۇلانىنىڭ اسكەري قىزمەتشىلەرىنە ىستىق تاماق اكەلدى. قازىرگى ۋاقىتتا ولار تاۋلىك بويى تۇرعىنداردىڭ تىنىشتىعىن كۇزەتىپ تۇر. اكسيا بارىسىندا مۇقتاج كوپبالالى انالار مەن جالعىزباستى قاراعاندىلىقتار نازاردان تىس قالعان جوق. ىستىق تاماقتى تاسىمالداۋ قاراعاندى قالاسىنىڭ ىشكى ىستەر ورگاندارىنىڭ، سونداي-اق الەۋمەتتىك قامسىزداندىرۋ سالاسىنداعى ۋاكىلەتتى ورگاننىڭ باسشىلىعىمەن كەلىسىلدى.

اۆتور: اگاتا مۋحامەدجانوۆا