توتەنشە جاعدايدىڭ العاشقى كۇندەرى الماتىنىڭ مەديتسينالىق ۇيىمدارى قالاي جۇمىس ىستەدى

الماتى. قازاقپارات - الماتى قالالىق قوعامدىق دەنساۋلىق ساقتاۋ باسقارماسى توتەنشە جاعدايدىڭ العاشقى كۇندەرىندە جەدەل جاردەم قىزمەتىنىڭ جۇمىسىن كورسەتتى، دەپ حابارلايدى قازاقپارات ءتىلشىسى.

جاپپاي تارتىپسىزدىكتەر بولعان كۇندەردەگى ۆيدەولاردان قيراعان قالانى، №7-قالالىق كلينيكالىق اۋرۋحانانىڭ شاعىلعان تەرەزەلەرى مەن سىنعان ەسىكتەرىن، جەدەل جاردەم كولىگىنە جاسالعان شابۋىلدى، سونداي- اق جارالانعان ادامداردى كورۋگە بولادى. №7-قالالىق كلينيكالىق اۋرۋحانا قىزمەتكەرلەرىنىڭ ءبىرى 5-قاڭتار كۇنى كەشكى ۋاقىتتان باستاپ 8-قاڭتار تۇسكى دەيىن جاعدايدىڭ قيىن بولعانىن ايتتى. اگرەسسيۆتى توپ اۋرۋحانا اۋماعىنا باسىپ كىرىپ، ەسىك پەن تەرەزەلەردى سىندىرىپ، وق جاۋدىرعان.

«ناۋقاستار جاتقان جانساقتاۋ بولىمىنە قاراي وق اتىلدى. ءبىزدىڭ قىزمەتكەرلەرگە دە قاۋىپ ءتوندى. ءبىز بۇلىكشىلەر ەمدەلۋشىلەر مەن قىزمەتكەرلەردى كەپىلگە الما ما دەپ قورىقتىق»، - دەيدى اۋرۋحانا قىزمەتكەرى.

الماتى قالالىق جەدەل جاردەم قىزمەتى ديرەكتورىنىڭ ورىنباسارى اندرەي لوجكين 4-قاڭتار كۇنى كەشكى ۋاقىتتا قىزمەت ەكسترەمالدى رەجيمدە جۇمىس ىستەي باستاعانىن ايتتى.

«قىزمەتكەرلەر قاتتى قورىقتى. سونىڭ كەسىرىنەن بۇگىندە ولاردىڭ كوبى جۇمىسقا شىقپاي وتىر. باسىم بولىگى باقىلاۋ- وتكىزۋ بەكەتتەرىنەن وتە المايدى. ءبىراق جەدەل جاردەم قىزمەتى ءوز قىزمەتىن اتقارىپ جاتىر. بۇگىندە 187 بريگادانىڭ شىعۋىن قامتاماسىز ەتىپ وتىرمىز. سونداي-اق، جەدەل ءبولىم دە شتاتتىق رەجيمدە جۇمىس ىستەپ تۇر. شاقىرتۋلاردى قابىلدايتىن قىزدارعا قوسىمشا جۇكتەمە جۇكتەلدى. ولار قوڭىراۋ شالۋشىنىڭ داۋىسىنا، ينتوناتسياسىنا ەرەكشە نازار اۋدارۋلارى كەرەك. ياعني، سويلەگەن ءسوزى مەن داۋىسى ارقىلى ونىڭ قانشالىقتى قاۋىپتى ادام ەكەنىن انىقتايمىز»، - دەدى ول.

ايتا كەتەيىك، الماتىدا جاپپاي تارتىپسىزدىكتەر كەزىندە 32 جەدەل جاردەم كولىگى ءبۇلىندى.

اۆتور: الما مۇقانوۆا