قاراعاندى سودىرلار قولىنان قازا تاپقان تاعى ءبىر ساربازدى سوڭعى ساپارعا شىعارىپ سالدى

انتىنا ادال 28 جاستاعى كاپيتان 7-قاڭتاردا ازاماتتىق بورىشىن وتەۋ بارىسىندا قىرشىنىنان قيىلدى، دەپ حابارلايدى قازاقپارات ءتىلشىسى.

كەشە شاحاندىقتار اسكەري قىزمەتكەر ءادىل نۇركەنوۆتى اقتىق ساپارعا شىعارىپ سالدى. نەبارى 28 جاستاعى كاپيتان تالدىقورعانداعى تالقانداۋدى كوزدەگەن بۇلىكشىلەرگە تويتارىس بەرۋ كەزىندە كوز جۇمعان بولاتىن. مارقۇمنىڭ سوڭىندا ءبىر قىزى مەن جۇبايى قالدى. بەيبىتشىلىك پەن تۇراقتىلىقتىڭ، وتان الدىنداعى ەرلىك جولىندا جانىن پيدا ەتكەن جاۋىنگەردىڭ ەرلىگى ماڭگىلىك ەل جادىندا قالا بەرمەك.

جاڭا جىل مەرەكەسىنە وراي تالدىقورعانعا ارنايى بارعان ءادىل نۇركەنوۆتىڭ اتا-اناسى ۇلدارىن التىنشى قاڭتاردا سوڭعى رەت كورگەن. جەتىنشى قاڭتاردا كەزەكتى جۇمىسقا شىققان اسكەري قىزمەتكەر ارىپتەسىمەن كولىكتە وتىرعاندا لاڭكەستەر وق جاۋدىرعان. جاڭبىرشا جاۋعان وقتىڭ ءبىرى ءادىل نۇركەنوۆتىڭ بۇيرەگىنە تيگەن.

«قابىرعامىزدى قايىستىرعان قايعىلى حاباردى ەستىگەننەن بەرى اكە-شەشەسى ەستەرىن جيا الماي وتىر. بەيبىت كۇندە وسىنداي جاعدايدىڭ بولعانى جانىمىزعا باتادى. ارتىندا قالعان جانۇياسىنىڭ كۇنى نە بولادى؟ حالىققا قورعان بولام دەگەن ماقساتىنىڭ سوڭى وسىلاي اياقتالعانى جانىڭدى اۋىرتپاي قويمايدى. سەنبەسكە، كونبەسكە امالىمىز جوق»، - دەيدى مارقۇم ءا. نۇركەنوۆتىڭ تۋىسى الماگۇل يماشەۆا.

ۇلتتىق قاۋىپسىزدىك كوميتەتىنىڭ كىشى جەدەل ۋاكىلى قىزمەتىن اتقارعان مارقۇم ءادىل نۇركەنوۆكە پرەزيدەنت قاسىم- جومارت توقايەۆتىڭ جارلىعىمەن «جاۋىنگەرلىك ەرلىگى ءۇشىن» مەدالى بەرىلدى. مەملەكەت باسشىسى تاپسىرماسىنا وراي، مارقۇمدى جەرلەۋ مەن نەسيەسى بولسا تولىقتاي كەشىرۋ، قولداۋ كورسەتۋ سەكىلدى مىندەتتەردى اكىمدىك ءوز مويىنىنا العان.

وبلىس اكىمىنىڭ ورىنباسارى ابزال نۇكەنوۆ ايماق باسشىسى اتىنان كوڭىل ايتۋ حاتىن جولدادى. ق م د ب باستاماسىمەن جالپىۇلتتىق ازا تۇتۋ كۇنىنە وراي ەلىمىزدىڭ بارلىق مەشىتتەرىندە ءبىر مەزەتتە قاسيەتتى قۇران وقىلىپ، حاتىم دۇعاسى باعىشتالدى.

وسى ورايدا، «انەت بابا» مەشىتىندە دە مارقۇمداردىڭ رۋحىنا دۇعا جاسالدى. 600 بەتتەن تۇراتىن قۇران كىتاپ تولىق وقىلدى.

«وسى ءبىر كۇندەردە ءبىراز باۋىرلارىمىز باقيلىققا اتتاندى. مارقۇم جاندارعا قۇران حاتىم وقىلدى. ەلىمىزدىڭ اماندىعى، بەيبىتشىلىگى جولىندا مارقۇم بولعاندارعا جالپىۇلتتىق ازا تۇتۋ كۇنى ارنايى وقىلىپ وتىر»، - دەدى وبلىستىڭ باس يمامى ءومىرزاق قاجى بەكقوجا.

اۆتور: اگاتا مۋحامەدجانوۆا