سودىرلار مەن ولارعا كومەك كورسەتكەندەردى جازاعا تارتۋ كەرەك - مەملەكەت باسشىسى
نۇر-سۇلتان. قازاقپارات - ارنايى تەرگەۋ توبى تراگەديانىڭ بارلىق سەبەبى مەن ءمان-جايىن اشۋى كەرەك.
بۇگىن پارلامەنت ءماجىلىسىنىڭ جالپى وتىرىسىندا مەملەكەت باسشىسى قاسىم-جومارت توقايەۆ وسىلاي ءمالىم ەتتى، دەپ حابارلايدى قازاقپارات ءتىلشىسى.
مەملەكەت باسشىسى ەلىمىزدەگى بەيبىت تۇرعىندارعا قارسى قىلمىستارعا قاتىستى سودىرلار مەن ولارعا كومەك كورسەتكەندەردى انىقتاپ، جازاعا تارتۋ كەرەكتىگىن قاداپ ايتتى.
سونىمەن قاتار لاڭكەستىك شابۋىلداردىڭ ارتىندا كىم تۇرعانىن تىڭعىلىقتى انىقتاۋ وتە ماڭىزدى بولىپ تۇر.
مۇنىمەن قوسا پرەزيدەنت سودىرلار مەن ولاردىڭ كوماندالىق پۋنكتىنىڭ قىزمەتى نە سەبەپتى مەملەكەتتىڭ نازارىنان تىس قالعانىن ەگجەي-تەگجەيلى تەكسەرۋ كەرەك ەكەنىن ايتتى.
«نە سەبەپتى ەلىمىزدىڭ اۋماعىندا وسىنشاما زاڭسىز قارۋ مەن ارنايى قۇرالدار تابىلدى؟ نەگە تەرروريزم نىساندارىن انىقتاۋ مەن بەيتاراپتاندىرۋ بويىنشا اگەنتۋرا جۇمىسى جۇرگىزىلمەدى؟»، - دەدى مەملەكەت باسشىسى.
وسى ورايدا قاسىم-جومارت توقايەۆ ارنايى تەرگەۋ توبى ساپالى ءارى تولىق كولەمدە ءوز جۇمىسىن اتقارىپ، تراگەديانىڭ بارلىق سەبەبى مەن ءمان-جايىن اشۋى كەرەك ەكەنىن تاپسىردى.
