جاپپاي ەرەۋىل كەزىندە مارقۇم بولعان پوليتسەيلەر مەن اسكەريلەردىڭ وتباسىنا پاتەر بەرىلەدى

ق ر قۇرىلىسشىلار وداعى حالىق الدىنداعى الەۋمەتتىك جاۋاپكەرشىلىگىن سەزىنە وتىرىپ، وسىنداي شەشىم قابىلدادى.

وداق ەلىمىزدىڭ ءاربىر ازاماتى ءۇشىن وسىنداي اۋىر كەزەڭدە مەملەكەت باسشىسى قاسىم-جومارت توقايەۆتىڭ باستامالارىن تولىق قولدايدى.

قازاقستان پرەزيدەنتىنىڭ باستاماسىمەن قۇرىلعان «قازاقستان حالقىنا» اتتى قوعامدىق قور جانە قۇرىلىسشىلار وداعى بىرلەسىپ، حالىقتى تەررورلىق شابۋىلدان قورعايمىن دەپ جانىن قيعان پوليتسەيلەر مەن اسكەري قىزمەتشىلەردىڭ وتباسىلارىنا پاتەر كىلتىن تاپسىراتىن بولدى.

بۇل ىسكە وداق اتىنان Qazaq Stroy، Exclusive Group، Kusto Home، Nest Stroy، Saba Group KZ، Sheber Group، Tau Development، Time Group Hayat Construction، ديال ستروي، اتريكس ستروي كومپانيالارى ۇلەس قوسادى.

بۇگىنگى تاڭدا قۇرىلىسشىلار وداعى الماتىداعى زارداپ شەككەن نىسانداردى تازارتۋ جانە قالپىنا كەلتىرۋ ىسىنە بەلسەنە اتسالىسىپ جاتىر.

«قازاقستاندا قالىپتاسقان قيىن جاعدايدى ەسكەرە وتىرىپ، وتاندىق بيزنەس وكىلدەرىن مەملەكەت باسشىسىنىڭ باستاماسىن قولداۋعا شاقىرامىز» دەلىنگەن وداق ۇندەۋىندە.