ۇ ق ش ۇ باس حاتشىسى حالىقارالىق ۇيىم باسشىلارىنا قازاقستانداعى بىتىمگەرلىك وپەراتسيا تۋرالى شەشىمدى قالاي جەتكىزگەنىن ايتتى
نۇر- سۇلتان. قازاقپارات - ۇ ق ش ۇ باس حاتشىسى ستانيسلاۆ زاس حالىقارالىق ۇيىم باسشىلارىنا قازاقستانعا بىتىمگەرلىك كونتينگەنتتى كىرگىزۋ تۋرالى شەشىمدى قالاي جەتكىزگەنىن ايتتى، دەپ حابارلايدى قازاقپارات ءتىلشىسى.
«قازاقستان رەسپۋبليكاسىنىڭ اۋماعىندا بىتىمگەرلىك وپەراتسيا وتكىزۋ تۋرالى قابىلدانعان شەشىم جونىندە ب ۇ ۇ- نىڭ باس حاتشىسى ارقىلى ب ۇ ۇ قاۋىپسىزدىك كەڭەسىنىڭ مۇشەلەرى حاباردار ەتىلدى. سونداي- اق، مەن ە ق ى ۇ جانە ش ى ۇ باس حاتشىلارىن قۇلاعدار ەتتىم. ب ا ق وكىلدەرى ءبىر مەزگىلدە ماسەلەنى شەشۋ ءۇشىن قابىلداعان جولدار جانە ورىندالۋ مەحانيزمىن ءتۇسىندىرۋ جۇمىستارىن جۇرگىزدى»، - دەدى ۇيىمنىڭ باس حاتشىسى.
كەزەكتەن تىس وتىرىس كەزىندە مەملەكەت باسشىسى قاسىم- جومارت توقايەۆ ۇ ق ش ۇ ەلدەرىنىڭ باسشىلارىنا دەر كەزىندە كورسەتكەن قولداۋى ءۇشىن العىس ايتتى.
«الەكساندر گريگوريەۆيچ لۋكاشەنكوعا، سادىر نۇرعوجا جاپاروۆقا، ەمومالي شاريپوۆيچ راحمونوۆقا ساياسي، ءتىپتى جاۋىنگەرلىك باۋىرلاستىق ءۇشىن راحمەت ايتامىن. بۇگىن بىزدە قازاقستانداعى تراگەديا كۇندەرى قايتىس بولعانداردى ەسكە الۋعا ارنالعان جالپىۇلتتىق ازا تۇتۋ كۇنى. سىزدەرگە وسى وقيعا بويىنشا قايعىمىزدى بولىسكەندەرىڭىز ءۇشىن شىن جۇرەكتەن ريزامىن. ۇ ق ش ۇ باس حاتشىسى ستانيسلاۆ ۆاسيليەۆيچ زاسكە، حاتشىلىقتىڭ بارشا جۇمىلعان ۇجىمىنا، ۇيىمىمىزدىڭ بىرلەسكەن شتابىنا ەرەكشە العىس ايتامىن»، - دەدى مەملەكەت باسشىسى.
ەسكە سالساق، ماڭعىستاۋ وبلىسىنداعى بەيبىت شەرۋدىڭ جالعاسى ءبىرقاتار وڭىردە جاپپاي تارتىپسىزدىككە ۇلاسىپ، ق ر پرەزيدەنتى قاسىم- جومارت توقايەۆ ۇجىمدىق قاۋىپسىزدىك شارت ۇيىمىنا مۇشە ەلدەردىڭ باسشىلارىنان تەررورلىق سىن- قاتەردى ەڭسەرۋد ءۇشىن كومەك سۇراعان بولاتىن. 10 - قاڭتار كۇنى ق ر قورعانىس مينيسترلىگى مەن ۇ ق ش ۇ ۇجىمدىق بىتىمگەرشىلىك كۇشتەر قولباسشىلىعى مالىمدەمە جاسادى.
بۇگىن ق ر مەملەكەتتىك حاتشىسى ەرلان قارين ماڭعىستاۋ وبلىسىندا ۇ ق ش ۇ اسكەرى ورنالاسقان دەگەن اقپاراتتى جوققا شىعاردى. ونىڭ ايتۋىنشا، ۇ ق ش ۇ اسكەرى داعدارىس اياقتالعاننان كەيىن ەلدەرىنە قايتادى.
اۆتور: ەسىمجان ناقتىباي
