سودىرلاردىڭ ماقساتى بيلىكتى باسىپ الۋ بولدى - پرەزيدەنت
«...الەۋمەتتىك، ەكونوميكالىق، قوعامدىق، ساياسي تالاپتار كەيىنگە ىسىرىلدى، ولار ءتىپتى ۇمىتىلىپ كەتتى. وسىدان كەيىن ءوز ساعاتىن كۇتكەن قارۋلى سودىرلار توبى ارەكەت ەتە باستادى. باستى ماقساتى دا بەلگىلى بولدى - كونستيتۋتسيالىق قۇرىلىمدى بۇزۋ، باسقارۋ ينستيتۋتتارىن قۇلاتۋ، بيلىكتى باسىپ الۋ. مۇندا مەملەكەتتىك توڭكەرىس تۋرالى ايتىلىپ وتىر»، - دەدى قاسىم-جومارت توقايەۆ.
ءوز سوزىندە مەملەكەت باسشىسى بارلىق قارۋلى وقيعالاردىڭ ءبىر ورتالىقتان ۇيىمداستىرىلعانىن ايتتى.
«مۇقيات جوسپارلانعان وپەراتسيا شەشۋشى فازاسىنا ەندى. مۇنى وڭىرلىك بيلىكتىڭ، قۇقىق قورعاۋ ورگاندارىنىڭ عيماراتتارىنا، تەرگەۋ يزولياتورلارىنا، ستراتەگيالىق نىساندار مەن بانكتەرگە، تەلەمۇنارالار مەن ارنالارعا جاسالعان سينحروندى، قايتالاپ ايتامىن، سينحروندى شابۋىلدار ايعاقتايدى. اۋەجايلار باسىپ الىندى، اۆتوكولىك جانە تەمىر جولدار جابىلدى، جەدەل جاردەم مەن ءورت سوندىرۋشىلەردىڭ جۇمىسىنا كەدەرگى جاسالدى»، - دەدى پرەزيدەنت.
ايتا كەتەيىك، بۇگىن ۇ ق ش ۇ ۇجىمدىق قاۋىپسىزدىك كەڭەسىنىڭ كەزەكتەن تىس سەسسياسى ءوتتى. جيىن قازاقستان تاراپىنىڭ باستاماسىمەن شاقىرىلدى.
ەسكە سالايىق، ق ر پرەزيدەنتى قاسىم-جومارت توقايەۆ ۇ ق ش ۇ مۇشە ەلدەردىڭ باسشىلارىنان ەل اۋماعىنداعى تەرروريستىك قاۋىپتى ەڭسەرۋ ءۇشىن قازاقستانعا كومەك كورسەتۋدى سۇراعان بولاتىن.
