ەرلان قارين ماڭعىستاۋ وبلىسىندا ۇ ق ش ۇ اسكەرى ورنالاسقان دەگەن اقپاراتتى جوققا شىعاردى
نۇر- سۇلتان. قازاقپارات – ق ر مەملەكەتتىك حاتشىسى ەرلان قارين ماڭعىستاۋ وبلىسىندا ۇجىمدىق قاۋىپسىزدىك تۋرالى شارت ۇيىمىنىڭ (و د ك ب) اسكەرى ورنالاسقان دەگەن اقپاراتتى جوققا شىعاردى، دەپ حابارلايدى قازاقپارات.
«بيىلعى 4-8-قاڭتار ارالىعىندا ماڭعىستاۋ وبلىسىندا بولدىم. وندا احۋالدى تۇراقتاندىرۋ جونىندەگى وڭىرلىك شتابتىڭ جۇمىسىن ۇيلەستىرۋگە اتسالىستىم. ايماقتاعى احۋال قازىر تۇراقتى. مەملەكەتتىك مەكەمەلەر مەن كوممۋنالدىق قىزمەتتەردىڭ بارلىعى قالىپتى رەجىمدە جۇمىس ىستەپ جاتىر. قۇقىق قورعاۋ ورگاندارى جاعدايدى تولىق باقىلاۋدا ۇستاپ تۇر»، - دەدى مەملەكەتتىك حاتشى فەيسبۋكتەگى پاراقشاسىندا.
ودان بولەك ەرلان قارين ماڭعىستاۋ وبلىسىندا ءتارتىپتى تەك ۇلتتىق ۇلاننىڭ ساربازدارى قاداعالاپ تۇرعانىن ايتتى.
«قوعام بەلسەندىلەرىنىڭ ارقاسىندا بيلىك پەن نارازىلىق بىلدىرگەن ازاماتتاردىڭ اراسىندا كونسترۋكتيۆتى ديالوگ ورنىقتى. وسى وڭىردە ۇجىمدىق قاۋىپسىزدىك تۋرالى شارت ۇيىمىنىڭ (و د ك ب) اسكەرى ورنالاسقان دەگەن قاۋەسەت شىندىققا جاناسپايدى. وبلىستاعى توتەنشە جاعداي رەجىمىن قامتاماسىز ەتۋگە ءوز ەلىمىزدىڭ قارۋلى كۇشتەرىنىڭ جانە ۇلتتىق ۇلاننىڭ بولىمشەلەرى عانا جۇمىلدىرىلعان»، - دەدى ول.
