باۋىرجان بايبەك: ەل پرەزيدەنتى بىردەن ءبىر دۇرىس شەشىم قابىلدادى
نۇر- سۇلتان. قازاقپارات - «Nur Otan» پارتياسى ءتوراعاسىنىڭ ءبىرىنشى ورىنباسارى باۋىرجان بايبەك Facebook-تەگى پاراقشاسىندا ەلدە ورىن العان لاڭكەستىك ارەكەتكە قاتىستى جازبا جاريالادى.
***
«ەلىمىز العاش رەت بۇرىن سوڭدى بولماعان اۋقىمداعى لاڭكەستىككە تاپ بولدى. احۋال بارعان سايىن كۇردەلەنە ءتۇستى. بەيبىت تۇردە باستالعان ميتينگىنى دەسترۋكتيۆتى كۇشتەر مەن ارانداتۋشىلار پايدالانىپ، جازىقسىز جانداردىڭ قانى توگىلدى، مەملەكەت پەن ازاماتتارعا وراسان زور مورالدىق جانە ماتەريالدىق زيان كەلتىرىلدى. جاعدايدىڭ ۋشىعۋىنا جاۋاپسىز، بالكىم، ىقتيمال بەلسەندىلەر شوعىرىنىڭ قاساقانا ارەكەتى جول اشا ءتۇستى. كەشە مەملەكەت باسشىسى قاسىم- جومارت كەمەل ۇلى توقايەۆ اعىمداعى احۋالعا ءدال باعا بەرىپ، قاۋىپسىزدىكتى قامتاماسىز ەتۋ، ازاماتتاردىڭ ءومىرىن قورعاۋ جانە ەلدەگى جاعدايدى تۇراقتاندىرۋ بويىنشا ناقتى تاپسىرمالار بەردى. قالىپتاسقان جاعدايدا ەل پرەزيدەنتى لاڭكەستەر مەن بۇزاقىلارعا قاتىستى بارىنشا قاتاڭ شارا قولدانۋ جونىندە بىردەن ءبىر دۇرىس شەشىم قابىلدادى.
كونستيتۋتسيانىڭ كەپىلى رەتىندە مەملەكەت باسشىسى قازاقستان رەسپۋبليكاسىنىڭ ازاماتتارىن قورعاۋ جانە قۇقىقتىق ءتارتىپتى قالپىنا كەلتىرۋ ءۇشىن بارلىعىن جاساۋدا. ادام ومىرىنەن قىمبات ەش نارسە جوق! ەڭ دامىعان دەموكراتيالىق ەلدەردىڭ وزىندە ادامدار قىرعىنعا ۇشىراعان لاڭكەستىك اكتىلەر جاعدايىندا بارىنشا قاتاڭ شارالار قابىلدانادى. ەل پرەزيدەنتىنىڭ تاپسىرماسىمەن قۇرىلعان تەرگەۋ توبى سەبەپتەردى سارالاپ، بارشا كىنالىلەردى انىقتايتىنىنا سەنىمدىمىن. لاڭكەستەر، مارودەرلەر، ارانداتۋشىلار، سونداي- اق ۇيىمداستىرۋشىلار زاڭعا سايكەس قاتاڭ قىلمىستىق جاۋاپقا تارتىلاتىن بولادى.
وسى كۇندەرى نۇروتاندىقتار حالىقپەن بىرگە الدىڭعى شەپتەن تابىلۋدا. قالىپتاسقان احۋالعا وراي ءبىزدىڭ فيليالدارىمىز بەن قوعامدىق قابىلداۋ بولمەلەرىمىز قارقىندى جۇمىس ىستەۋدە. دەپۋتاتتار، بەلسەندىلەر مەن ۆولونتەرلار جەرگىلىكتى جەرلەردە اكىمدىكتەرگە كومەك كورسەتۋدە. الدا قيراعان قالالاردى قالپىنا كەلتىرۋ جانە زارداپ شەككەندەرگە اتاۋلى كومەك كورسەتۋ بويىنشا كوپ جۇمىس تۇر. بيلەۋشى پارتيا رەتىندە «Nur Otan» وسىعان ءوزىنىڭ بارلىق ۇيىمدىق، كادرلىق جانە باسقا دا رەسۋرستارىن باعىتتايدى.
بۇگىن ەلباسى نۇرسۇلتان ءابىش ۇلى نازاربايەۆ ايتقانداي، وسىناۋ سىن- قاتەرلەردى ەڭسەرىپ، ەلىمىزدىڭ تۇتاستىعى مەن قاۋىپسىزدىگىن قامتاماسىز ەتۋ ءۇشىن بارشامىز مەملەكەت باسشىسى قاسىم- جومارت كەمەل ۇلى توقايەۆتىڭ ماڭايىنا توپتاسۋىمىز كەرەك. بارشا قازاقستاندىقتاردى ارانداتۋلارعا بوي الدىرماي، اۋىزبىرشىلىك تانىتىپ، قۇقىق قورعاۋ جانە جەرگىلىكتى اتقارۋ ورگاندارىنا جان- جاقتى كومەك كورسەتۋگە شاقىرامىن. بارشا قازا تاپقان جانداردىڭ وتباسىلارى مەن جاقىندارىنا قايعىلارىنا ورتاقتاسىپ، پارتيا اتىنان كوڭىل ايتامىز. ءبىزدىڭ كۇشىمىز بىرلىكتە! قيىندىقتى ەڭسەرىپ، جەڭىسكە بىرگە جەتەمىز!»، - دەپ جازدى باۋىرجان بايبەك.
