راسۋل جۇمالى: قاجەت بولسا، ەلدەگى ءتارتىپتى قولعا قارۋ الىپ قورعاۋعا دايىنبىز
نۇر-سۇلتان. قازاقپارات - ساياسات تانۋشى راسۋل جۇمالى ق ر پرەزيدەنتى قاسىم-جومارت توقايەۆ ەلدەگى جاعدايعا بايلانىستى قازاقستان حالقىنا جولداعان ۇندەۋىنە وراي پىكىر ءبىلدىردى، دەپ حابارلايدى قازاقپارات ءتىلشىسى.
«ەلدە بولىپ جاتقان جاعدايلار - ەشقانداي دەموكراتياعا قاتىسى جوق دۇنيەلەر. سىرتتان كەلگەن كەم دەگەندە بىرنەشە ءجۇز ادام (وزبەكستان، قىرعىزستان، اۋعانستان دەپ ەستىپ جاتىرمىز) كاسىبي، ارميالىق دايىندىعى بار ازاماتتار ءبىزدىڭ اشىنعان حالىقتىڭ اڭگىمەسىن پايدالانا وتىرىپ، ءوزىنىڭ ماسەلەسىن شەشۋ ءۇشىن ۇلكەن قياناتقا بارىپ وتىر. قيانات بولعاندا، ازاماتتاردىڭ ولىمىنە، ادامداردىڭ ولىمىنە اكەلىپ جاتقان ۇلكەن تراگەديا تۋىنداتىپ وتىر. ونى ەندى ايقىن كورىپ وتىرمىز. كەشەلى بەرى الماتىنىڭ بەس تەلەارناسىن ورتەگەن، جويعان. كوكتوبەدەگى اقپارات تاراتۋشى ورتالىققا قاساقانا شابۋىلدار جاسالدى. ونىڭ ىشىندە، وكىنىشكە قاراي، ءبىزدىڭ كەيبىر زيالىسىماق ازاماتتاردىڭ دا تىرلىگى بار. وسىعان الداندى، باسقا دا بولدى دەگەندەي»، - دەيدى ساراپشى.
قوعام قايراتكەرى باسقىنشىلىقا بارعان توپتاردىڭ ارەكەتىنەن جىمىسقى ماقساتتارىن تۇسىنۋگە بولاتىنىن ايتادى.
«مەنىڭ ويىمشا، باستى ماقساتتارى الدىمەن قارۋ-جاراق ارسەنالدارىن الۋ بولعان. الماتىداعى قارۋ ساتاتىن دۇكەندەردىڭ ءبارى تۇگەل تونالعان. ەكىنشىدەن، قارۋ-جاراق ساقتالعان قويمالاردى، شەكارا قىزمەتى ينستيتۋتىنىڭ جۇمىسىن تۇرالاتۋ ءۇشىن ءبىر جاعىنان دۇكەندەرگە، ەكىنشى جاعىنان سونداي نىساندارعا شابۋىل جاسالعان»، - دەدى راسۋل جۇمالى.
ونىڭ ايتۋىنا قاراعاندا قازىرگى قازاقستاندىقتاردىڭ ءبارىنىڭ ورتاق مىندەتى - ەلدى تۇراقتاندىرىپ، حالىقتىڭ جاعدايىن جاساۋ.
«كەرەك بولسا، پوليتسيا مەن ارميا قياناتقا بارۋعا ءماجبۇر بولىپ وتىر. سوندىقتان، بۇل جاعدايدا ازاماتتارعا ەس جياتىن، اقىلعا توقتايتىن كەز كەلدى. بۇل ويىنشىق ەمەس. ەلدىڭ بولاشاعى بار ما، جوق پا؟ ءبىز مەملەكەت رەتىندە ساقتالامىز با، ساقتالمايمىز با دەيتىن ساتكە تاپ كەلىپ تۇرمىز. بۇگىن وتە كۇردەلى جاعدايدا تۇرمىز. ءوز باسىم ەل ىشىندە جۇرگەن ازاماتتار، ەلدىڭ بولاشاعىن ويلايتىن ازاماتتار ويلاناتىن، سابىرعا توقتايتىن كەز كەلدى»، - دەيدى ساياساتتانۋشى.
سونىمەن قاتار، ول پرەزيدەنت وتە دۇرىس باعىت ۇستانىپ وتىر دەپ ەسەپتەيدى.
«پرەزيدەنتتىڭ سوزىنە توقتاپ، قولداۋىمىز كەرەك. ەلىمىزدەگى ەڭ باتىل، ەڭ ساپالى شەشىم قابىلدايتىن ءبىر عانا ينستيتۋت قالدى قازىر. ول - پرەزيدەنت. پرەزيدەنتتىڭ جانىنا توپتاسۋىمىز كەرەك. قاجەت بولسا، قولىمىزعا قارۋ الىپ ءبىز دە كوشەگە شىعۋعا ءازىرمىز. ەلىمىزدە تارتىپكە قارسى، مەملەكەتكە قارسى، كونستيتۋتسيالىق باعىتقا قارسى شىعىپ جاتقان ازاماتتار وزدەرىن كوپشىلىكپىز دەپ ويلاماسىن. كوپشىلىك - ءبىزبىز. جاعدايدىڭ قالاي بولاتىنىن ءبىز شەشەمىز. سونى ەسكەرسىن»، - دەپ تۇيىندەدى ساراپشى.
