ۇ ق ش ۇ كومەگىنە جۇگىنۋ قازاقستاننىڭ ەگەمەندىگىن شەكتەمەيدى - ساراپشى
نۇر-سۇلتان. قازاقپارات - ۇجىمدىق قاۋىپسىزدىك تۋرالى شارت ۇيىمىنىڭ كومەگىنە جۇگىنۋ قازاقستاننىڭ ەگەمەندىگىن شەكتەمەيدى.
ق ر پرەزيدەنتى جانىنداعى قازاقستان ستراتەگيالىق زەرتتەۋ ينستيتۋتى ديرەكتورىنىڭ ورىنباسارى سانات كوشكىمبايەۆ «حابار 24» تەلەارناسىنا بەرگەن سۇحباتىندا وسىنداي پىكىر ءبىلدىردى، دەپ حابارلايدى قازاقپارات ءتىلشىسى.
«ارينە، بۇعان دەيىن مۇنداي وقيعا بولىپ كورمەگەن. بارىنەن بۇرىن ۇجىمدىق قاۋىپسىزدىك تۋرالى شارت ۇيىمىنىڭ مانداتى سىرتقى اگرەسسيادان قورعاۋمەن بايلانىستى. ءبىراق، پرەزيدەنت ايتقانداي، بۇل جەردە اڭگىمە حالىقارالىق كونتەكستەگى احۋالمەن بايلانىستى بولىپ وتىر. ياعني، بۇل حالىقارالىق تەرروريستىك توپتار. سوندىقتان قالىپتاسقان جاعدايدا پرەزيدەنتتىڭ ۇجىمدىق قاۋىپسىزدىك تۋرالى شارت ۇيىمىنا شۇعىل تارتىپپەن جۇگىنۋ مانداتى بار»، - دەدى سانات كوشكىمبايەۆ.
سونداي-اق، ول ۇجىمدىق قاۋىپسىزدىك تۋرالى شارت ۇيىمىنا مۇشە ەلدەر بۇل مىندەتتەمەلەردى ەرىكتى تۇردە ورىندايتىنىن اتاپ ءوتتى.
«بىرىنشىدەن، ۇجىمدىق قاۋىپسىزدىك تۋرالى شارت ۇيىمىنا مۇشە ەلدەردىڭ بۇل مىندەتتەمەلەرى ەرىكتى ەكەنىن ايتۋ كەرەك. بۇل جەردە قازاقستاننىڭ الدىنا مىندەتتەمەلەر قويىلمايدى. ءبىز ولاردى توتەنشە جاعداي رەجيمى كەزەڭىندە عانا ەنگىزەمىز. سوندىقتان مۇنىڭ ەگەمەندىكتى شەكتەۋمەن ەشبىر بايلانىسى جوق. بۇل ناقتى كۇشتىك وپەراتسيا جانە احۋالدى تۇراقتاندىرۋ ءۇشىن كورسەتىلىپ وتىرعان كومەك قانا»، - دەدى ساراپشى.
