اتاۋلى الەۋمەتتىك كومەكتى توتەنشە جاعداي كەزىندە تولەۋ اۆتوماتتى تۇردە سوزىلادى

بۇل تۋرالى ق ر ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ەربول وسپانوۆ ورتالىق كوممۋنيكاتسيالار قىزمەتىندە وتكەن بريفينگىدە ايتتى، دەپ حابارلايدى قازاقپارات ءتىلشىسى.

«ق ر ەڭبەك جانە حالىقتى الەۋمەتتىك قورعاۋ مينيسترلىگى قازاقستان رەسپۋبليكاسىنىڭ اۋماعىندا ەنگىزىلگەن توتەنشە جاعداي كەزىندە مەملەكەتتىڭ الەۋمەتتىك قامتاماسىز ەتۋ مىندەتتەرىن ۋاقتىلى جانە تولىق ورىنداۋ ءۇشىن بارلىق ءىس-شارالاردى ىسكە اسىرىپ جاتىر. اتاپ ايتقاندا، 2021- جىلدىڭ ءتورتىنشى توقسانىندا اتاۋلى الەۋمەتتىك كومەكتى توتەنشە جاعداي كەزىندە تولەۋ اۆتوماتتى تۇردە سوزىلادى جانە ول ازاماتتارعا ەشقايدا بارۋدىڭ قاجەتى جوق. مۇگەدەكتىگى بار ازاماتتارعا توتەنشە جاعداي كەزىندە قايتا كۋالاندىرۋ ۋاقىتى كەلگەن جاعدايدا مۇگەدەكتىگى اۆتوماتتى تۇردە سوزىلادى جانە دە وسى ازاماتتارعا ەشقايدا بارۋدىڭ قاجەتى جوق»، - دەگەن ەربول وسپانوۆ بۇل جۇمىستار اقپاراتتىق جۇيە ارقىلى جاسالاتىنىن ءتۇسىندىردى.

سونداي-اق، زەينەتاقى مەن الەۋمەتتىك جاردەماقى الاتىن ازاماتتاردىڭ الدىنداعى مەملەكەتتىك مىندەتتەمەلەرى كەدەرگىسىز ورىندالىپ جاتقانىن اتادى.

«سونىمەن قاتار بارلىق زەينەتاقى مەن الەۋمەتتىك جاردەماقى الاتىن ازاماتتاردىڭ الدىنداعى مەملەكەتتىك مىندەتتەمەلەردىڭ ءبارى ۋاقتىلى جانە تولىق كولەمدە ورىندالىپ جاتىر»، - دەدى ۆيتسە-مينيستر».