الماتىدا ارانداتۋشىلار اۋرۋحانانىڭ مۇلكىن قيراتتى

الماتى قالاسى قوعامدىق دەنساۋلىق باسقارماسىنىڭ مالىمەتىنشە، اگرەسسيۆتى ازاماتتار مەگاپوليستىڭ ەمحانالارى مەن اۋرۋحانالارىنا كىرىپ، مەديتسينالىق مەكەمەلەردىڭ مۇلىكتەرى مەن جابدىقتارىنا زيان كەلتىرۋدە.

«زاڭسىز ارەكەتتەردىڭ سالدارىنان جەدەل جاردەمنىڭ 5 قىزمەتكەرى، ونىڭ ىشىندە 2 جۇرگىزۋشى مەن 3 مەديتسينا قىزمەتكەرى زارداپ شەكتى. زارداپ شەككەندەر قالالىق ستاتسيونارلارعا جەتكىزىلدى»، - دەلىنگەن حابارلامادا.

سونىمەن قاتار، 2 جەدەل جاردەم كولىگى جويىلىپ، قالالىق كارديولوگيالىق ورتالىقتا قابىلداۋ بولمەسى مەن كلينيكالىق- دياگنوستيكالىق بولىمشەنىڭ اينەكتەرى سىنعان.

«المالى اۋدانىنىڭ ا م س ك عيماراتىندا ۆانداليزم اكتىسى تىركەلدى. ناۋرىزباي اۋدانىندا №7 ق ك ا قابىلداۋ بولمەسىنە پاتسيەنتپەن جەدەل جاردەم كولىگىنىڭ قاتىناۋى توقتاتىلدى. سونىمەن قاتار، دەسترۋكتيۆتى ارەكەتتەردى جاقتاۋشىلار جەدەل جاردەم كولىگىن توقتاتىپ، بالالاردى اۋرۋحانالارعا جاتقىزۋعا جول بەرمەيدى»، - دەپ حابارلادى باسقارمادان.

بۇل ارەكەتتەر پاتسيەنتتەرگە ۋاقتىلى مەديتسينالىق كومەك كورسەتۋگە كەدەرگى كەلتىرەدى جانە ازاماتتاردىڭ دەنساۋلىعى مەن ومىرىنە قاۋىپ توندىرەدى.

اۆتور: الما مۇقانوۆا