وڭىرلەردەگى توتەنشە جاعداي: باس پروكۋراتۋرا قازاقستاندىقتارعا ەسكەرتۋ جاسادى

***

قازاقستان رەسپۋبليكاسى باس پروكۋرورىنىڭ ورىنباسارى ب. ب. دەمبايەۆتىڭ «پروكۋراتۋرا تۋرالى» زاڭنىڭ 31-بابى تارتىبىندە ۇندەۋى

قۇرمەتتى ازاماتتار!

قوعامدىق قاۋىپسىزدىكتى قامتاماسىز ەتۋ، زاڭدىلىق پەن قۇقىقتىق ءتارتىپتى قالپىنا كەلتىرۋ، ازاماتتاردىڭ قۇقىقتارى مەن بوستاندىقتارىن قورعاۋ ماقساتىندا قازاقستان رەسپۋبليكاسى پرەزيدەنتىنىڭ جارلىقتارىمەن الماتى قالاسى مەن ماڭعىستاۋ وبلىسىنىڭ اۋماعىندا 2022 -جىلعى 5-قاڭتار ساعات 01:30-دان 2022 -جىلعى 19-قاڭتار ساعات 00:00-گە دەيىن توتەنشە جاعداي ەنگىزىلدى.

قازاقستان رەسپۋبليكاسى پرەزيدەنتىنىڭ جارلىقتارىنا سايكەس توتەنشە جاعداي قولدانىلاتىن كەزەڭدە ول ەنگىزىلگەن جەردە مىناداي نەگىزگى شارالار مەن ۋاقىتشا شەكتەۋلەر كوزدەلگەن:

- ەركىن ءجۇرىپ-تۇرۋعا، ونىڭ ىشىندە كولىك قۇرالدارىنىڭ كىرۋى مەن شىعۋىنا شەكتەۋلەر بەلگىلەندى؛

- تۇلعالاردىڭ جەكە باسىن كۋالاندىراتىن قۇجاتتاردى تەكسەرۋ، جەكە تەكسەرۋ، ولاردىڭ جانىنداعى زاتتارىن، كولىك قۇرالدارىن تەكسەرۋ؛

- بەيبىت جيىندارعا، ەرەۋىلدەرگە جانە باسقا دا جاپپاي ءىس-شارالارعا تىيىم سالىندى.

قوسىمشا ۋاقىتشا شەكتەۋ شارالارى رەتىندە ساعات 23:00-دەن 07:00-گە دەيىن كومەندانتتىق ساعات ەنگىزىلگەن، قارۋدى، وق- دارىلەردى، جارىلعىش زاتتاردى، ەتيل سپيرتىن جانە الكوگول ونىمدەرىن ساتۋعا تىيىم سالىنعان، جەكە تۇلعالاردان قارۋ مەن وق- دارىلەردى ۋاقىتشا الىپ قويۋ كوزدەلگەن.

قازاقستان رەسپۋبليكاسى «توتەنشە جاعداي تۋرالى» زاڭىنىڭ 20-بابىنا سايكەس كومەندانتتىق ساعات قاعيدالارىن بۇزعان جەكە تۇلعالاردى پوليتسيا قىزمەتكەرلەرى نەمەسە اسكەري پاترۋلدەر كومەندانتتىق ساعات اياقتالعانعا دەيىن، ال وزىمەن بىرگە ولاردىڭ جەكە باسىن كۋالاندىراتىن قۇجاتتارى جوق ادامداردى - ولاردىڭ جەكە باسىن انىقتاعانعا دەيىن، ءبىراق ىشكى ىستەر ورگانى باستىعىنىڭ نەمەسە ونىڭ ورىنباسارىنىڭ شەشىمى بويىنشا 48 ساعاتتان اسىرماي ۇستاۋعا ءتيىس.

ۇستالعان ادامدار جانە ولاردىڭ الىپ جۇرگەن زاتتارى مەن كولىك قۇرالدارى تەكسەرىلۋى مۇمكىن.

توتەنشە جاعداي رەجيمىنىڭ كورسەتىلگەن تالاپتارىن بۇزعانى ءۇشىن كىنالى تۇلعالار قىلمىستىق جانە اكىمشىلىك جاۋاپتىلىققا تارتىلاتىنىن اتاپ وتەمىز.

وسىلايشا، بيلىك وكىلىنىڭ زاڭدى تالابىنا نەمەسە وكىمىنە باعىنباۋ، سونداي-اق توتەنشە جاعداي كەزەڭىندە تىيىم سالىنعان ەرەۋىلگە باسشىلىق ەتۋ جانە ۇيىمداردىڭ جۇمىسىنا كەدەرگى كەلتىرۋ قىلمىستىق كودەكستىڭ (بۇدان ءارى – ق ك) 379 جانە 401-باپتارى بويىنشا 2 جىلعا دەيىن باس بوستاندىعىنان ايىرۋعا اكەپ سوعادى.

توتەنشە جاعداي كەزىندە كورىنەۋ جالعان اقپارات تاراتۋ ق ك-نىڭ 274-بابىنا ساي 3 جىلدان 7 جىلعا دەيىن باس بوستاندىعىنان ايىرۋمەن جازالانادى.

توتەنشە جاعداي كەزىندە قارۋ-جاراقتى، وق- دارىلەردى، قوزعالىس قۇرالدارىن، اسكەري تەحنيكانى نەمەسە وزگە دە اسكەري مۇلىكتى قاساقانا جويۋ نەمەسە ءبۇلدىرۋ 10 جىلدان 12 جىلعا دەيىنگى مەرزىمگە باس بوستاندىعىنان ايىرۋدى كوزدەيدى (ق ك-نىڭ 459-بابى).

توتەنشە جاعداي رەجيمىن بۇزعانى ءۇشىن (اكىمشىلىك قۇقىق بۇزۋشىلىق تۋرالى كودەكستىڭ (بۇدان ءارى – ا ق ب ت ك) 476-بابى)، توتەنشە جاعداي كەزىندە قۇقىق ءتارتىبىن بۇزۋعا يتەرمەلەيتىن ارەكەتتەرى ءۇشىن (ا ق ب ت ك-نىڭ 478-بابى) تيىسىنشە 15 جانە 30 تاۋلىككە دەيىن اكىمشىلىك قاماققا الۋ كوزدەلگەن.

بۇل رەتتە توتەنشە جاعداي كەزىندە قىلمىستىق نەمەسە اكىمشىلىك قۇقىق بۇزۋشىلىقتار جاساۋ اۋىرلاتاتىن ءمان- جاي بولىپ تابىلادى (قك- ءنىڭ 54-بابى، ا ق ب ت ك- ءنىڭ 57-بابى) جانە نەعۇرلىم قاتاڭ جاۋاپتىلىققا اكەپ سوعادى.

زاڭدىلىقتى قامتاماسىز ەتۋ ماقساتىندا، «پروكۋراتۋرا تۋرالى» زاڭنىڭ 31-بابىن باسشىلىققا الا وتىرىپ، ازاماتتاردى وتكىزىلەتىن ءىس- شارالارعا تۇسىنىستىكپەن قاراۋعا، ىشكى ىستەر ورگاندارى مەن ۋاكىلەتتى ورگاندار قىزمەتكەرلەرىنىڭ زاڭدى تالاپتارىن ساقتاۋعا، ولارعا قاجەتتى جاردەم كورسەتۋگە شاقىرامىز.

سونداي-اق، شىندىققا سايكەس كەلمەيتىن مالىمەتتەردى تاراتپاۋعا، ارانداتۋشىلىققا بەرىلمەۋگە جانە توتەنشە جاعداي رەجيمىن بۇزباۋعا، رەسمي دەرەككوزدەردە ورنالاستىرىلعان ەلدەگى اعىمداعى جاعداي تۋرالى سەنىمدى اقپاراتتى باسشىلىققا الۋعا شاقىرامىز.

اۆتور: ەسىمجان ناقتىباي