جىگىتتىڭ جاقسىسى دۇرىس سوزگە توقتاي بىلگەن - ديماش قۇدايبەرگەن
نۇر- سۇلتان. قازاقپارات - قازاقستاننىڭ جارىق جۇلدىزى، ءانشى ديماش قۇدايبەرگەن وڭىرلەردەگى دەمونستراتسيالارعا بايلانىستى ەل حالقىنا ۇندەۋ جولدادى، دەپ حابارلايدى قازاقپارات.
«ارداقتى اعايىن! جىراقتا ءىس ساپاردا ءجۇرىپ، ەلدەگى بولىپ جاتقان جاعدايدى ەستىپ، كوڭىلىم الاڭداۋلى. تۋعان جەرىم، ەلىم مەن ءۇشىن ءارقاشان قىمبات - حالقىممەن بىرگەمىن. ءبارىمىز ءۇشىن ەڭ باستىسى - حالىقتىڭ بىرلىگى، اماندىعى، ەلدىڭ ءار ازاماتىنىڭ الەۋمەتتىك جاعدايىنىڭ دۇرىستىعى. نارازىلىعىن بىلدىرۋگە كەلگەن ۇلكەن دە كىشى دە وتباسىنىڭ قامى ءۇشىن ءجۇر. بۇگىندە كۇنكورىس كۇن سايىن قىمباتتاپ، حالىققا وڭايعا سوعىپ جاتقان جوق. حالىق شارشادى!» دەپ جازدى ديماش ءوزىنىڭ Instagram پاراقشاسىندا.
سوندىقتان قازاقستاندىق ورىنداۋشى تۇرمىس- تىرشىلىك دەڭگەيىن كوتەرۋ ماقساتىندا جۇيەلى ءارى ناقتى شارالار قولدانىلۋى كەرەك دەپ سانايدى.
«تەك ءبىر ماسەلە - جىرتىعىمىزدى جامايمىز دەپ ءجۇرىپ، بىرلىگىمىزگە نۇقسان كەلتىرىپ المايىق، اعايىن! «جىگىتتىڭ جاقسىسى - دۇرىس سوزگە توقتاي بىلگەن، باسقانى سوزىنە توقتاتا بىلگەن». بيلىكتەگى قۇزىرلى ازاماتتار تەز ارادا وڭتايلى شەشىم قابىلداپ، قوردالانعان ماسەلەلەردى شەشسىن. بارىنشا سابىرمەن، جاعدايعا بايىپپەن قاراپ، ءوزارا ورتاق شەشىم قابىلداۋعا ۇمتىلايىق! بيلىك تاراپىنان حالىققا كۇش كورسەتىلمەي، حالىق تاراپىنان اقىلعا جەڭدىرىپ، ءار قادامدى، ەرتەڭگى كۇنىمىزدى ويلاپ ءبىر مامىلەگە كەلۋگە جازعاي! امان بول، ەلىم!» دەپ تۇيىندەدى ءسوزىن قازاقستاندىق ءانشى.
